ORANJESTAD (AAN): Director di Directie Natuur en Milieu (DNM), Gisbert Boekhoudt a duna di conoce durante un conferencia di prensa diaranson atardi cu a laga traha un investigacion di CARMABI (Caribisch Marine Biologish Institute) y
presentacion di esaki a duna na Gobierno na September ultimo riba e manera con ta bay anda cu esaki.
Boekhoudt a duna un actualisacion riba con ta atendiendo riba e tema di medio ambiente, specialmente pa loke ta trata RWZI y Parkietenbos.
El a duna un splicacion riba con e problema ta hinca den otro. El a bisa cu no ta un problema linear (un solo problema), pero tin diferente otro aspecto cu ta parti di dje.
Tin aspectonan cu ta riba un termino cortico riba kico por haci pa adresa e problema mesora pero tambe tin cosnan cu ta bay tuma mas tempo, a remarca.
A traha un raport y esaki ta e CARMABI raport unda a puntra diferente organisacion oferta y CARMABI a gan'e na 2018. Na 2019 nan a cuminsa cu e investigacion. Despues Covid a presenta y a finalisa e raport na December 2020.
A base di esaki a cuminsa e trayectoria con pa integra e diferente aspectonan pa yega na un solucion.
E raport riba su mes ta duna contenido na unda por wak kico a bay bon y kico a bay malo. Ta bay traha a base di e SDG's (Sustainable Development Goals) 2021-2030.
Tin 9 aña pa cumpli cu esaki, Boekhoudt a splica.
