Minister Geoffrey Wever:
ORANJESTAD (AAN): Minister Geoffrey Wever ta anuncia inicio di e estudio basa riba e tipo di ‘greenhouses’ mas ideal, cultivonan prometedor y sondeo di metodonan di cultivo den agricultura comercial na Aruba. E estudio aki ta otro colaboracion hunto cu Hulanda como parti tambe di e maneho di Ministerio di Asuntonan Economico, Comunicacion y Desaroyo Sostenibel pa e desaroyo di industria agricola como un pilar di nos economia. Resultado di e estudio, cual ser financia pa Hulanda, lo bira parti di e maneho pa stimula e industria agricola.
Desde su aprobacion riba 21 di maart 2023 den conseho di minister, e ‘Plan di Accion 2023-2025: Aruba su transicion pa un modelo economico sostenibel y inclusivo’ ta den ehecucion pa desaroyo empresarial y uzo di tecnologia innovativo den e sector agricola. Cu e Agri Fund y Agri Business Academy den cooperacion cu Qredits Aruba den pleno ehecucion, riba peticion di minister Geoffrey Wever, conseho di minister a aproba e ampliacion di e Landspakket; e estudio aki den sector agricola y tambe e financiamiento pa ehecuta esaki.
Despues di evaluacion mutuo y cu aprobacion, di tanto Gobierno di Aruba y Hulanda , e compania escogi Priva / Greengrounds a cuminsa cu e investigacion riba e uzo optimal di “greenhouses” den agricultura comercial na Aruba. Durante e reunion digital cu Priva / Greengrounds y participacion di Departamento di Asuntonan Economico, Santa Rosa y CBS a elabora riba e diferente fasenan di e investigacion. Priva / Greengrounds ta premira cu pa december 2024 tin e resultado final di e investigacion.
“Mi ta contento cu despues di un periodo di preparacion e investigacion riba e uzo optimal di tecnologia innovativo den e industria agricola. E estudio aki ta completa tur loke mi Ministerio ta haci pa stimula e desaroyo economico y diversifica Aruba su economia. E resultado lo forma e base pa e Agri Innovation Park cu lo trece solucionnan pa pusha e desaroyo di e industria agrícola y asina diversifica Aruba su economia", segun minister Geoffrey Wever. Desaroyo di un Agri Innovation Park ta forma parti di e ‘Plan di Accion 2023-2025: Aruba su transicion pa un modelo economico sostenibel y inclusivo’.
E aplicacion di e ‘Landspakket’ como instrumento ta trece structura pa e desaroyo di pais Aruba y ta facilita e creacion y ehecucion di varios proyecto concreto na un manera integral. Den e trayecto di 2021 padilanti, e cooperacion cu Hulanda a resulta di ta uno positivo cu a trece beneficio den forma di experticio, ayudo financiero y asistencia tecnico. 'Landspakket' ta un instrumento extra cu Aruba tin na su disposicion por avansa e maneho necesario y realisa e vision economico di Aruba den bienestar di tur ciudadano, y mester percura pa continua haci bon uzo di e cooperacion aki.
