Frank Benita: ---ORANJESTAD (AAN): Despues cu Dialuna mainta durante un conferencia di prensa Minister di Naturaleza Ursell Arends a papia tocante e problema di e RWZI-nan,
cu ta Rioolwaterzuiveringsinstallaties (plantanan di purificacion di awa), Frank Benita, Hoofd Beheer Waterschappen di D.O.W , a hiba palabra.
El a indica cu e RWZI-nan y e sistema di riool ta cay bao di su encargo.
Segun Benita, Aruba conoce 3 planta di purificacion.
“RWZI si funcion ta pa purifica awa di riool y tambe awa di pos”.
RZZI Bubali ta esun mas bieu y ta purifica awa di riool.
Actualmente e planta aki ta ricibi 8000 kuub di awa, siendo cu e ta diseña pa ricibi solamente 4.500 kuub, segun Benita, kende a indica cu e planta tin un tecnologia anticua.
El a splica cu esaki ta forma un peliger pa medio ambiente y nos sector turistico.
“Na Parkietenbos nos tin nos planta di purificacion cu ta un tiki mas nobo, data di 2007”.
E planta aki ta diseña pa tuma awa septico (awa di pos) y awor ta tumando 1550 kuub pa dia, mientras cu su diseño ta pa ricibi 1500 kuub, segun e experto di D.O.W.
El a sigui bisa cu e Parkietenbos ta central pa loke ta procesamento di e slip di tur tres planta.
Segun Benita, RWZI Zeewijk tin un capacidad di 5000 kuub pa dia, pero e ta ricibiendo 500 kuub diario.
El a splica cu e RWZI aki tin tecnologia mas moderno.
Benita a indica cu diferente asunto den pasado a pone cu e situacion ta manera cu e ta actualmente.
El a splica cu na 1992 a tuma lugar traspaso di RWZI Bubali pa Gobierno y na 1995 e prome renovacion a tuma lugar, unda cu a upgrade e parti hidraulico y e parti biologico.
Na aña 2007 a tuma lugar e di dos renovacion di RWZI Bubali unda cu a bolbe concentra riba e parti hidraulico esta pa e tuma mas awa, pero a laga e parti biologico afo cu ta e curazon di e planta pa por haci e purificacion.
“Na 2007 RWZI Parkietenbos a drenta den operacion cu e sistema nobo y na 2008 Zeeijk tambe a drenta den operacion”.
Basicamente a bay di 1 pa 3 planta, pero no a percura pa e fondonan necesario pa mantene e plantanan aki den bon estado di operacion parti.
Na 2005 na D.O.W nos a dicidi cu nos ta bay inverti 1 miyon florin di e propio presupuesto, pa asina nos por haci mantencion corectivo grandi pa e plantanan, segun Benita.
El a splica cu ya caba e plantanan a cuminza bay hopi mas atras.
Segun e experto, na 2017 D.O.W a haci un partnership cu TNO, pa TNO a bin cu un estudio preliminario pa wak si ta posibel pa e plantanan produci gas biologico y ta sostenible riba nan mes.
“E estudio a demostra locual ya caba nos tabata sospecha, esta cu e planta ta ricibiendo double di su capacidad, pues e no tin suficiente oxigeno pa procesa e awa debidamente”.
Banda di esaki e curazon di e planta ta den mal estado.
Na 2018 nos a manda conseho pa realoca fondonan pa haci mantencion, pero e fondonan aki a bay pa e incinerator, ya cu na e momentonan ey nos tabata kima e mesun slip di RWZI y nos mester a cumpli cu e normanan di medio ambiente, segun Benita.
El a indica cu na 2019 a manda dos rapport pa Gobierno pa mustra riba e hecho cu e situacion na RWZI Bubali ta hopi precario y cu tin mester di fondo pa drenta den accion pa drecha e planta.
“Ya caba e ta un peliger pa medio ambiente, mirando cu RWZI Bubali no ta cumpli cu su propio normanan”.
Na 2020 nos a logra haya 3.8 miyon di inversion pa mantencion di tur 3 planta, segun Benita, kende a sigui bisa cu nos tin mester di un planta nobo na Bubali, pasobra dentro di 5 aña ta bay tin 2 pa 3 hotel y condominiums cu ta bay bin acerca.
Esakinan ta cambernan adicional y presion atrobe riba e sistema di purificacion di RWZI Bubali.
Benita a sigui bisa cu crecemento di nos economia turistico mester bay man den man cu e desaroyo di RWZI Bubali.
