Prome Minister Evelyn Wever-Croes:
- Traduciendo e progreso den prosperidad den cada hogar na Aruba
ORANJESTAD (AAN): Un di e temanan cu a worde trata durante e Conferencia di Prensa di Gobierno di Aruba diahuebs mainta, ta e prome aumentonan cu a worde duna na empleadonan publico y DPS.
Gobierno ta hibando un bon maneho financiero y pa e motibo ey por a crea e espacio financiero pa e alivio pa e empleado publico cu desde aña 2018 no a haya un indexering di salario, y na juli 2024 e empleadonan publico, incluyendo DPS (Dienst Publieke Scholen) a haya nan merecido indexering.
Prome Minister Evelyn Wever-Croes ta indica cu ta trata di un total di 4298 persona cu a haya un aumento di salario di 6% na juli 2024, y na januari 2025 nan lo haya e otro parti di e aumento cu ta di 5.7%. Gobierno a aloca 21.1 miyon Florin pa e aumento di aña 2024 y pa e aumento di aña 2025, Gobierno lo mester aloca mas di 65.1 miyon Florin.
“Danki na e bon situacion financiero cu Aruba tin na e momento aki, Gobierno a cuminsa aumenta e entrada di e ciudadano, yudando asina cu e poder di compra y asina e progreso di e pais por worde traduci den prosperdidad den cada hogar na Aruba”, Prome Minister a expresa.
