Eleccion 2025 mester ta basa riba continuacion di regla pa bon maneho
*Na 2017 abuso di placa di Aruba a topa cu crisis regional di Maduro
*Tur plan presenta pa politica lo wordo analisa a base di cifra concreto
ORANJESTAD (AAN) — For di momento cu Aruba a subi e caminda di recuperacion na 2018 despues di cambio di Gobierno Mike Eman pa Gobierno Evelyn Wever-Croes, DIARIO a asumi e posicion cu vigilancia di gobernacion lo ta den cuadro di e Ley di Contabilidad, den cual e bienestar material di Pueblo di Aruba ta hancra.
Manera DIARIO a presenta na Aruba, democracia ta mara gobernacion di un pais na regla y ta exigi bon gobernacion a base di Leynan cu ta dicidi con personanan cu Pueblo eligi, ta gasta e placa di belasting di Pueblo.
E Ley cu ta sigura cu husticia ta wordo haci cu Pueblo dor di politiconan, ta e Ley di Contabilidad, manera awor historia di Aruba lo presenta na mundo na momento cu Aruba ta entrega prueba di bon gobernacion na Reino y na henter mundo.
Ora papia di Ley di Contabilidad, ta papia di e responsabilidad mayor di Parlamento di Aruba cu ta e cuna di e Gobierno ehecutivo, e Conseho di Ministronan cu mester honra e deseo di Pueblo di Aruba.
Edicionnan di DIARIO lo duna prueba con na 2017, Aruba tabata den un estado di desesperacion gubernamental pa dos motibo.
Na 2016, Aruba a bira victima di e abuso politico mas grandi cu Aruba a conoce ora Gobierno di Mike Eman pa sconde e desastre cu a rementa for di 2013, a bay tene man di Nicolas Maduro pa introduci e proyecto di Citgo.
Mundo financiero a hari Aruba na momento cu a bira conoci, cu Aruba a dicidi pa pone su economia y futuro financiero den man di Nicolas Maduro, mientras Venezolanonan tabata uza Aruba pa lanta nan placa na banconan na Venezuela, pa establece nan mes pafor di Venezuela.
Loke a resta di turismo di Venezuela cu tabata uno di e mercadonan turistico di Aruba, tabata Venezolanonan cu tabata huy di nan pais.
Caida di turismo di Venezuela a nifica cu accion rapido mester a wordo tuma. E soño falso di Citgo pa cual Gobierno di Mike Eman a pone Aruba baila, a wordo reemplaza pa Aruba na careda pa reemplaza e turista Venezolano cu a bira refugiado pero tambe otro metodonan cu no ta e falsedad di Citgo di Mike Eman, cu a laga e monstruo di debe nacional atras pa Aruba paga.
DIARIO semper a acusa e forma cu Gobierno Mike Eman a traiciona bienestar di Aruba, cu e Ley di Contabilidad den man.
Gobiernonan di Mike Eman a trapa riba e Ley di Contabilidad, cu ta exigi pa e mayoria di Parlamento garantisa cu Gobierno ta uza placa di Pueblo a base di reglanan cu no ta permiti e aventuranan di Mike Eman cu solamente a goberna na un forma cu e por a duna continuacion na su realidad cu for di 1986, cu excepcion di algun aña, Pueblo di Aruba pa percura pa su entrada principal como consehero di Gobiernonan Henny Eman, despues e mes den Parlamento di Aruba y finalmente Ministro Presidente di Aruba.
Cambio di Gobierno 2017 a scapa Aruba di bancarota y na 2018 por mira con contenido ta wordo duna na e Ley di Contabilidad, na momento cu Gobierno Wever-Croes haci su entrada y dos dama asumi responsabilidadnan central den maneho financiero.
Gabinete Wever-Croes a conoce un Ministro Presidente Evelyn Wever-Croes cu un refleho total riba calidad y costo di e aparato gubernamental di Aruba. Central den e maneho di placa di Aruba, tabta Ministro Xiomara Maduro encarga cu e presupuestonan, cu ta mira luz a base di cumplimento cu tur necesidad di e pais, a base di e Ley di Contabilidad cu ta exigi un maneho stringente di placa di Pueblo.
Gobierno di Reino a mustra cu continuidad mester wordo duna na e maneho di Gobierno Wever-Croes, cu ta un ehempel den Reino.
Awe por nota con henter Aruba, ta goza di e contenido real di democracia, cu ta bon maneho financiero cu ta haci posibel pa atende cu loke ta parti di bida diario di e Pueblo cu ta comparti e exito financiero di e pais directamente.
Un Aruba recupera ta confronta un situacion mundial delicado, den cual e no por ta un peso pa Hulanda, pa Reino, cu ta busca su propio solucionnan pa problemanan cu Aruba ya ta resolve, manera vivienda pa Pueblo, entrada pa Pueblo.
Tur esaki di acuerdo cu e base di bon gobernacion, cu ta hancra den e Ley di Contabilidad cu ta e herment pa Parlamento exigi bon gobernacion, pero e Ley cu a wordo silencia dor di e partido di Mike Eman den gobernacion y den Parlamento.
Un Aruba cu na 2017 a subi caminda pa eleccion den estado di bancarota pa motibo di e abuso cu Parlamento mayoritario di AVP a permiti di parti di Gobierno Mike Eman, awe den estado di recuperacion ta enfrenta eleccion 2025 como ehempel pa Reino.
E exito di Gobierno Evelyn Wever-Croes ta a base di e unico regla cu Ley di Contabilidad, e ley cu ta regla uzo di placa di Pueblo conoce como formula unico di democracia.
