Inscripcion ta habri online:
*Tanto na Playa como na San Nicolas
ORANJESTAD (AAN): Hefe di Desaroyo y Deporte di IBiSA, señor Rodymark Geerman, den un conferencia di prensa a anuncia cu IBiSA Kamp-2024 ta na caminda, cual actividad ya pa varios aña caba e Instituto ta organizando.
El duna di conoce cu den e periodo di vacacion grandi na Juli proximo, ta bay tin dos siman di programa pa nos muchanan y asina, pa e prome siman, cu ta di 15 pa 19 di Juli, lo bay tin dos Kamp den e mesun fechanan aki.
Na distrito di San Nicolas na IBiSA Sport Center, y na Playa ta bay ta den Centro di Bario Playa Pabao.
Na e di dos siman, tambe lo tin actividad pariba y pabao di brug, di 22 pa 26 di Juli. E Kamp lo tuma lugar na Scol Santa Famia, den Bario di Pos Chikito, y den Centro di Bario Noord.
Inscripcion lo habri Diaranzon 19 di Juni awo, via online. Geerman ta pidi pa registra na tempo y manera ta conoci tin un suma bo yiu participa, y pa sigura su lugar mester e suma aki mester ta paga.
Lo bin cu orarionan specifico unda cu e pagonan por wordo haci tanto na IBiSA Playa como na IBiSA San Nicolas.
“Tambe ta bon pa remarca cu mirando e ultimo desaroyonan cu tin, ta bay hinca e parti di charla y guia pa instructornan, di parti di Codigo di Proteccion, p’asina nan a bon educa pa por yuda deal cu nos muchanan durante e dos simannan largo cu nan ta bay ta bezig cu nan”, Rodymark Geerman, Hefe di Desaroyo y Deporte na IBiSA a conclui.
