ORANJESTAD (AAN): Stingray Swimming Team Aruba a finalisa un fin di siman extraordinario na Siegfried Francisco Invitational 2025 na Curaçao.
Cu cuatro sesion di competencia yena di energia, disciplina y pasion, nos delegacion di 21 atleta a representa Aruba cu orguyo, coleccionando 70 medaya: 29 oro, 23 plata y 18 brons, kibrando cantidad di mehoracion personal (PB’s) y mustrando un espirito di team ehemplar y determina.
Sesion 1 Highlights
Stingray a habri e competencia cu un actitud fuerte, acumulando 7 oro, 8 plata y 4 brons. Leandro Santiesteban, Iva Werleman, Emma Ponson y Richmyra Hoen a sobresali den varios evento, mientras e otro atletanan: Mary-Ann, Rosaleen, Vira y Emiliano tambe a briya. Y sin laga afor e potente relaynan di 9–10 y 13–14 mucha homber a gana oro; 13–14 mucha muher plata; y 11–12 mucha homber brons.
Sesion 2 Highlights
Sesion 2 a sigui cu e mesun potential di Stingray: 8 oro, 7 plata y 3 brons. E victorianan importante di Mary-Ann, Duncan, Emma, Leandro y Richmyra a domina e eventonan di velocidad. Dos mixed relays 9–10 y 8 & under a logra oro, mientras 11–12 relay a logra plata. Emiliano y Emma logra brons den e eventonan di lomba, demostrando un sesion halto di nivel.
Sesion 3 Highlights
Stingray no a baha intensidad y a agrega 9 oro, 3 plata y 7 brons na su coleccion. Leandro a domina den 50 Breast, 200 IM y 100 Free, mientras Emma y Iva a logra oro den 200 IM. Richmyra agrega un oro crucial den 100 Free. Tres mixed medley relays consecutivo a obtene oro, demostrando e forsa di ekip. Bartolomeo, Emiliano, Duncan, Emma, Zainel y Jordan a contribui cu plata y brons na e cantidad di medaya.
Sesion 4 Highlights
E ultimo sesion tabata un demostracion di resistencia fisico y mental, unda a logra un total di 5 medaya di oro, 5 plata y 4 brons. E atletanan a sigui logra PB’s y a finalisa fuerte despues di un programa intenso di tres dia. Stingray a mantene su nivel competitivo te ultimo heat, demostrando consistencia y determinacion.
High Point Trophy: Logro Extraordinario pa Stingray
E culminacion di e competencia aki a trece un momento di gran orguyo: varios atleta di Stingray a gana High Point Trophy den nan categoria, cual ta un prueba cla di consistencia, dominio y excelencia durante tur evento. E premio aki ta otorga solamente na e atleta cu ta logra e MAYOR total di punto den e 4 sesion di competencia. Un reconocemento cu ta exigi talento, disciplina y rendimento constante.
E logro aki ta mustra no solamente e capacidad individual, pero tambe e nivel di entrenamento y compromiso cu henter e team di Stingray.
- Girls 8 & under 3rd place: Mary-Ann Gammara
- Boys 8 & under 2nd place: Duncan Ponson
- Girls 9-10 1st place: Richmyra Hoen
- Girls 9-10 2nd place: Iva Werleman
- Girls 11-12 2nd place: Emma Ponson
- Boys 11-12 1st place: Leandro Santiesteban
Cada competencia un crecement mas fuerte
Durante tur cuatro sesion, Stingray Swimming Team Aruba a mustra cu nan no ta solamente compete, pero nan ta forma y inspira un generacion di atleta. Hopi PB’s, hopi medaya, hopi victoria den relays y excelente resultado di High Point Trophies, cu ta sigui pone nos team riba un nivel deportivo regional.
