*Dia 8 di September proximo
ORANJESTAD (AAN) – Juni Farro, director nobo di Instituto Biba Saludabel y Activo (IBiSA), a convoca un conferencia di prensa, Diaranzon 3 di Juli awo, den cual a anuncia e evento nobo cu nan ta organizando.
Sinta banda di dje tabata tin señor Rafael Perez, cu Race director di e carera cu IBiSA a lanza Diaranzon mainta.
“Cu sumo placer nos ta lanza awe nos siguiente evento cu ta e famoso “Turibana 10K” cu ta un carera cu a cuminza desde e añanan 80, bao guia di IDEFRE, awe cu 44 aña”, Juni Farro a menciona.
Esaki ta e di 44 edicion di e carera aki, cu lo ta bao encargo di IBiSA.
“Turibana Loop tin su historia amplio di coremento di Aruba. Aña pasa mas cu 450 coredor a participa den e maximo evento aki, y nos ta prepara e aña aki atrobe, pa un aña record di participante”, Farro a indica.
Inscripcion oficial a habri Diaranzon caba, y pueblo ta cordialmente invita pa subi e website ibisa.aw, y registra y por paga online y na oficina di IBiSA.
E fechanan pa Turibana 10K, lo bira 8 di September proximo y lo cuminza pa 6 or di mainta, for di MFA Noord. Seguidamente, el a pasa palabra pa Rafael Lopez, Director di Carera pa IBiSA.
