Miguel Ortiz ta relata:
ORANJESTAD (AAN) – Señor Miguel Ortiz, Presidente di Perla Gymnastics Aruba, a duna di conoce den entrevista cu DIARIO, cu Diadomingo aw, dia 5 di November, ta bay tin dos club local cu ta bay competi contra otro den Gimnasia artistico.
Ta trata di Perla Gymnastics y Avance Club, y e meta ta pa motiva locual ta gimnasia artistico na Aruba, mirando cu akinan no tin hopi, y nan tin cu competi afo locual ta costa e mayornan hopi placa.
Ortiz a menciona cu ta bay purba di inicia e competencia aki, pa asina na Aruba mes por cuminza competi contra otro, y asina trece e nivel di gymnastics artistico aki na Aruba mas na halto y na mesun momento duna e muchanan atleta cu no por bay afo, e oportunidad di competi localmente.
Esaki ta hopi importante pasobra e muchanan ta entrena hopi e diferente tecnica di gimnasia artistico, pero e parti mas importante ta e mental, cual cu sin un podium, sin competencia e muchanan no por presencia esey y no por entrena.
El a agrega cu e otro clubnan tambe ta haciendo un tremendo trabao y nan ta bayendo competi internacionalmente, y e nivel di gymnastics aki na Aruba, pa Aruba, ta hopi halto.
E meta final di e competencianan aki na Aruba mes, ta pa kita e muchanan for di caya, pa nan tin un lugar unda por entrega y dedica nan atardi unda cu nan no ta “weak aff” bay den e parti negativo, sino cu nan ta mantene nan mes den deporte, nan ta cognitive, motoric y socialmente bon bezig.
E competencia di Diadomingo 5 di November aki ta cuminza pa 9 or di mainta y ta caba 12’or di merdia, conhuntamente cu Club Avance. E fondonan colecta door di prijs di entrada ta bay ta pa desaroya e bunita iniciativa aki, Miguel Ortiz a menciona.
E ta bay tuma lugar na Perla Gymnastics mes.
