ORANJESTAD (AAN): Siman ta habri cu e informe di un ‘retiro masal’ di clubnan local for di Aruba Volleyball Bond.
Esey ta loke e portal 297Sports a raporta den fin di siman y a mustra cu clubnan di Volleyball a retira nan participacion for di e campeonato di Aruba Volleyball Bond. Esaki a bin ta culmina di basta tempo caba, cu vroem-vroem circulando cu tin conflicto fuerte den e Federacion y cu no a wordo resolvi manera hopi tabata spera.
El a escala y algun miembro di e directiva diario a entrega nan retiro for di e Federacion debi cu nan no ta haya e oido necesario. Ta parce cu durante un Reunion General recien teni, a sconde e informacion aki pa e clubnan miembro.
Mirando e hecho aki, awor 4 club miembro a dicidi di tuma accion y manda un carta pa e directiva di AVA, retirando temporalmente nan participacion den tur actividad di volleyball den tur categoria organisa pa e federacion.
Segun 297Sports, e cuatro clubnan ta SV Velocidad/Albo/Chaos Volleyball Team. Tambe SV Britannia/Phoenix Volleyball Team. Tambe Synergy Volleyball Team y SV Unistars Volleyball Team, kendenan a mustra cu no tin un confiansa mas den e maneho di e directiva actual unda nan a yega na e punto drastico aki pa retira tur nan teamnan for di e deporte.
A compronde cu e 4 clubnan a hasta pidi un investigacion independiente riba tur e sucedido den e Federacion di volleyball AVA.
Mirando cu segun regla den statuut cu tur actividad rond di e federacion lo wordo suspendi, carta a wordo manda pa mayornan riba e caso aki. Asina mes e 4 clubnan a uni pa no perhudica nan atletanan y lo ta preparando un campeonato alternativa pa asina toch e actividad di volleyball no stop pa e hungadornan, un competencia cu lo ta programa pa cuminza pronto.
