ORANJESTAD (AAN)- E inkt ariba papel un caba di seca, cu ya Team Snor ta den atake total! Contract estilo MOU a wordo firma
e siman aki entre Team Snor, guia p’e “beruchte” Snor Perez PhD MoD, y e trabuconan di Team Bao Palo, guia pa nada menos c’un tal Gibi!
Shonnan, Domino Square Garden na Calabas, lo ta epicentro atrobe di un otro temblor den mundo di domino. Awe Diasabra, 15 di augustus, cuminsando pa 7’or di anochi en punto(!), e embahador di China aki na Aruba, esta Han, lo tene otro candeloso encuentro di domino entre dos teamnan rival di Team Snor y Team Bao Palo..
Nos tin entendi cu ta net “rond” di fecha di hacimento di aña di “Snor” Perez e wega aki lo tuma luga, y si ta asina manera e rumornan ta core rond, ta hopi lo grita “hoy se bebe, mañana se debe!” Snor ta conoci pa su teorianan den domino estilo matematica avansa: Bo tabata sa cu si bo lanta cu 5 piedra di 6 den bo man, di cual un di nan ta 6-y-5, pero bo tin 1-y-blanco tambe den bo man, segun Snor, bo mester sali e ora cu e 1-y-blanco pa bo tin chens pa gana e wega? Bo no tabata sa? Wel shonnan, awe diasabra bay presencia e “workshap” di Don Snor pa bo hisa bo “domino skills to the next level”!
