Suyari Petronia haya morto cu tiro den cabez

Dos hoben di 17 aña a keda deteni.  ORANJESTAD (AAN): E tiro lo a sona basta duro!  E tabata un anochi trankilo caminda biento tabata supla tin biaha hasta cu 39 km/h.

    E trankilidad di e caya di Flamboyanstraat, cu ta un pida caya di 320 meter largo cu ta keda net pazuid di Botica di Servicio Sero Preto cu ta bay pabao y yega te na e cura di Scol Basico Xander Bogaerts.

   Riba Diabierna exactamente 4:20 am, yamada a drenta na Cuerpo Policial, y e notificacion espantoso ta cu un hende muher a wordo tira na un cas na Flamboyanstraat.

   Inmediatamente unidad di Polis di San Nicolas a wordo manda na e adres aki.  A yega na un cas cu tin un cura sin porta ni heki pafo.  Mesora e agentenan a yega na e porta principal di cas, y a bin haya un escena lamentable den sala.

   Vocero di Polis Lito Lacle, a indica na DIARIO cu e agentenan a bin haya un persona femenino tira abao den sala, cu un tiro den cabes. E momento ey ya caba e no tabatin signo vital mas.

   Mesora Polis a pidi pa tur instancia halto wordo notifica, y tambe pa manda Recherche y personal hudicial forensico di BFTO pa yega na e lugar.  Tambe a pidi pa manda un Docter.

   Polisnan mesora a seya e cas y e tereno pafo, pa asina conserva cualkier prueba cu tin paden.  Tambe a manda pidi yudanza di Slachtofferhulp pa bin duna sosten na amigonan, y tambe famia di e victima.

    Pa 5:40 am, Docter Texier a constata morto di Suyari R.C. Petronia di 20 aña, naci na Aruba.

   Polis na mesun momento no kier a duna detaye di ki hipotesis nan tin pa cu e matamento aki.  Tambe nan sa cu e dama hoben Suyari aki no ta biba na e cas ey.  Algun amigo a pone riba social media cu Suyari a djis bay na e cas ey pa ‘chill’.

   Suyari Petronia ta yiu muher di e conocido doño di Mike’s Disco, y sigur e noticia aki a trece tristeza inmenso pa nan.  Pero tambe a nota cu hobennan na Colegio EPI tabata lamenta su fayecimento riba Diabierna.  Suyari ta un alumno na EPI.

   E caso ta bao di investigacion, y vocero Lito Lacle a indica cu pa Cuerpo Policial por resolve mas caso, nan tin mester di cooperacion y informacion di pueblo di Aruba.  Pesey nan ta pidi si bo tin cualkier informacion yama tipline cu ta 111-41 y corda cu nan ta garantisa cu bo ta keda anonimo.

   DOS HOBEN ARESTA:

   Recherche di San Nicolas a cuminza traha di madruga caba riba e caso aki, y a logra di acumula basta detaye concreto den e caso lamentable aki.

   E investigacion a acelera na un forma positivo.

   E prome paso notable ta cu un hoben di inicial P. di apenas 17 aña di edad a bin entrega su mes na Warda di Polis na San Nicolas, y mesora el a wordo deteni.

   E investigacion a haya un momentum e ora ey, y den oranan di atardi nan tabatin suficiente informacion pa asina tene un razzia na un adres na Yara.

   Aki nan, team di Recherche reforza pa Atraco Team a yega di sorpresa y a detene 1 persona.  Vocero di Polis Lito Lacle a identifica e detenido na Yara como e hoben Z.A.C. di 17 aña.

   Nan lo wordo interoga awor pa asina haya sa si acaso tin di bay detene mas of no.

   DIARIO ta expresa palabranan di sentido pesame na famia y conocirnan.