Na April 2022 lo sigui cu caso Avestruz
ORANJESTAD (AA– Diaranson mainta Hues a dicidi cu no ta honra peticion di abogadonan pa haya e documentonan di Benny Sevinger a entrega na Polis. Di otro banda a honra e peticion pa kita e prohibicion di contacto contra Benny Sevinger. Hues a bisa cu na April 2022, despues di haya otro peticionnan di abogadonan, e lo bay dicidi riba e peticion pa interoga testigonan cu e abogadonan ta pidi.
ABOGADONAN KIER DOCUMENTONAN CU SEVINGER A ENTREGA
Ayera mainta den sala di Corte, abogado mr. Oomen a reacciona riba e punto di bista di e dos Fiscalnan riba e peticion di abogadonan mr. Kock y mr. Illes pa facilita copia di e documentonan cu Sevinger e entrega na Polis. Ta asina cu e dos Fiscalnan a nenga e peticion aki Diamars y a bisa cu e documentonan cu Sevinger a entrega na Polis, no ta relevante.
Mr. Oomen a bisa cu esaki ta preocupante. El a remarca na Hues cu e ta haya cu Fiscalnan ta pone solamente documentonan cu nan ta haya ta bon. Esey na opinion di mr. Oomen no ta corecto pa un proceso di husticia husto.
E abogado a bisa cu e ta haya e documentonan cu Sevinger a duna Polis importante pa hiba defensa di su clientenan. Tambe mr. Oomen a bisa cu e documentonan por hasta yuda pa cu e castigo. E abogado a pidi Hues pa aproba su peticion pa haya e documentonan pasobra esaki por perhudica su clientenan den e caso.
Despues di mr. Oomen a sigui abogadonan mr. Carlo y mr. Arendsz Marchena, kendenan a uni na e peticion di mr. Oomen. Tambe nan a mustra cu tin paginanan den e documentonan cu no a sali bon.
FISCAL
Fiscal a bisa Hues cu nan ta persisti cu no ta necesario pa pasa e documentonan di Sevinger. Fiscal tambe a bisa Hues cu e fecha tentativo di 1 April 2022 no ta realisabel pasobra e y su colega lo no ta na Aruba.
HUES TA RECHAZA PETICION DI ABOGADONAN
Hues a pospone e caso un rato pa bay pensa riba e peticion di abogadonan y tambe pa fiha un fecha pa e otro caso pro forma.
Hues a bolbe y a bisa cu relaciona cu e peticion pa cu e documentonan cu Sevinger a entrega na Polis, e ta haya cu tur documentonan ta importante y Fiscal ta responsabel pa e documentonan. Hues a rechaza e peticion aki.
Pa loke ta e peticion di mr. Kock y mr. Illes pa scucha testigonan, Hues a bisa cu mirando cu ainda falta peticion di e otro abogadonan, e ta wanta esaki te na April 2022.
CASO AVESTRUZ TA SIGUI NA APRIL 2022
Pa loke ta e fecha pa sigui cu e caso pro forma, Hues a bisa cu e tin cu tene cuenta cu agenda di Corte y no por bay desvia. Hues a bisa cu e caso lo sigui 1 April 2022 caminda un siman promer e kier pa e abogadonan manda nan peticionnan pa Fiscal. Hues a duna e Fiscalnan dia 4, 5 April pa reacciona y dia 6 di April, e lo dicidi riba esakinan.
Hues a bisa cu Fiscal lo mester wak si otro Fiscal lo por atende e caso pa cu e peticionnan. A pospone e caso pa 1 April 2022 pa 11’or di mainta.
