Minister Wever riba e 'Trade Mission':
ORANJESTAD (AAN): Diamars minister di Asuntonan Economico Geoffrey Wever durante un conferencia di prensa a papia riba e asina yama ‘Trade Mission to Colombia’, cu e ministerio a organiza hunto cu Camara di Comercio (KvK).
E mandatario a splica cu ora cu el a bira minister el a bisa cu un di su metanan lo ta pa mehora e relacionnan comercial y economico di Aruba den region.
Relacionnan cu entre otro Corsow, Panama, Republica Dominicano y tambe Colombia.
“Pa e motibo ey nos a organiza un Trade Mission, caminda cu nos kier yuda e comerciantenan di Aruba pa haci negoshi cu Colombia”.
Nos a hacie hunto cu KvK, pasobra nan tin tur e experticio y contactonan, debi na nan rol den sector comercial, tanto local como tambe internacional, segun Wever.
El a sigui bisa cu e ta hopi contento cu e trabao cu KvK ta haciendo, hunto cu Departamento di Asuntonan Economico.
Segun e minister, Colombia ta un pais hopi importante pa Aruba, unda cu nos isla tin lasonan estrecho cu e pais, no solamente comercial pero tambe riba e nivel personal.
“Segun e ultimo Census, e grupo mas grandi di personanan biba na Aruba cu no tin e nacionalidad Hulandes, ta personanan Colombiano”.
Mirando cu tin hopi Colombiano ta biba na Aruba, hopi comerciante a cuminza importa mas producto for di Colombia, mientras cu tin hopi viaha pa Colombia ta tuma lugar.
Como Gobierno nos kier stimula esey y wak con nos como Gobierno por facilita, pa por tin mas negoshi den region, segun e mandatario.
El a sigui bisa cu Colombia ta e di 6 ‘trade partner’ di Aruba.
Segun Wever, na 2022 Aruba a importa 2.6 biyon florin na producto di cual 72 miyon florin ta di Colombia, cu ta representa 3%.
El a indica cu Aruba ta importando mas producto for di paisnan mas leu y e intencion ta pa purba importa mas for di paisnan mas cerca manera Colombia, pa baha e gastonan di importacion.
“Esaki ta un bon oportunidad, unda cu Aruba tambe por exporta producto y ofrece servicio na Colombia”.
Un ehempel ta e hecho cu Aruba ta experto riba e tereno di hospitalidad , pues nos por cuminza pensa con nos por uza esaki tambe pa trece ingresonan adicional aden y ofrece posibilidadnan nobo pa nos empresanan, segun e mandatario.
Wever a splica cu durante e Trade Mission e ta bay hiba combersacionnan entre otro cu minister Colombiano di Economia y Comericio, mientras cu lo viaha pa Riohacha pa papia cu e Gobernador, pa papia riba e posibilidad cu esaki por ta un puerto nobo pa Aruba.
Tambe lo bay inaugura oficialmente e oficina cu Aruba tin na Holland House, pa Aruba tin presencia na Colombia.
