Haci algo rapido pa kita Aruba di lista di CDC
ORANJESTAD (AAN): Diaranson mainta durante un conferencia di prensa convoca na Plaza Turismo riba Linear Park, algun trahador di sector hotelero a bin expresa nan preocupacion, principalmente riba e hecho cu keto bay CDC di Merca tin Aruba riba e Lista Cora di riesgo “Very High” y ta desconseha viaheronan di bin Aruba.
Esaki ta sigui asina, siendo cu ya caba na Aruba e cantidad di casonan activo a bira hopi abao mes, y claramente e isla ya no tin ningun brote espantoso mas ta socede.
Un di esnan cu a hiba palabra ta e ehecutivo Ruchen Coffie cu ta trahando pa 35 aña caba den sector di Horeca, specificamente servicio di cuminda y bebida.
E proyeccion cu tabatin e temporada aki compara cu aña pasa, a baha cu mitar. Ta wordo menciona cu tin hopi turista cu a yega Diasabra na Aruba, pero e ‘calidad’ di turista no ta esun cu ta bishita e isla antes.
Kico por wordo haci? Esaki tin di bira tarea di esnan encarga cu mercadeo di turismo, pa por haci mas enfasis pa mehora e calidad di turistanan cu ta bin pa Aruba.
Claro, pueblo por ta contento cu e cantidad di turista cu ta hayando, pero e ‘calidad’ no tey. Nan ta hasta ripara prome cu e pandemia a cuminza, cu e calidad a cuminza baha. Awor el a baha hopi mas.
Esaki pues a bin ta un reto pa algun tempo caba pa negoshinan di turismo cu ta mirando con nan entrada ta bahando. Pero como cu e Arubianonan ta haci e trabao di sirbi turistanan cu asina hopi entusiasmo, pesey ta haci un suplica na e expertonan pa fix e asunto. E prome paso ta pa kita e nomber di Aruba for di e Code Red List di ‘Very High” aki.
E casonan activo di Coronavirus na Aruba awor ta menos di 100 persona, pues kico mas ta wardando? Nan ta suplica Oficina di Turismo na Merca, tambe Ministro Plenipotenciario di Aruba na Merca pa cuminza move, pa yuda pa cambia e ubicacion riba listanan, pa asina e turistanan cu ainda ta dudando, por cuminza haci nan reservacion atrobe y book pasashi pa bin Aruba.
“Nos pan ta den peligro, y corda cu e ta un snowball effect pa tur esnan trahando den turismo,” Ruchen Coffie a adverti. Tur ta come di e bolo, y si e sigui bira chikito, na final no tin bolo mas pa come.
