ORANJESTAD (AAN): Den cuadro di Dia di Rey, ‘Downtown Reinventa’ un biaha mas ta trece un otro magno evento riba 27 di April venidero, ‘Downtown Goes Orange’.
Na 2022 bou iniciativa di propietarionan den area di Weststraat, conhuntamente cu Impact Hub Aruba a uni forza pa asina strategicamente traha den un manera colectivo pa e revitalizacion di e area commercial den Weststraat.
“Na September 2022 a lansa e plataforma ‘Downtown Reinventa’ cu ta encabesa un serie di evento pa cu e area comercial di Weststraat, como tambe ta fungi como sosten pa otro personanan den e sector creativo cu tin ideanan pa organiza eventonan, exponiendo sea nan talento of otro disciplina di arte”, segun Señora Mary-Ann Falconi, General Manager di Impact Hub Aruba.
Na November 2022, e lansa e prome evento “Downtown Food & Art Festival” di cual mas di 2000 persona a bishita, incluyendo turistanan di crucero.
Cumpliendo cu e proposito di yuda revitalisa e area di Downtown Oranjestad, partnersnan den Weststraat ta lansa e siguiente evento, cu ta ‘Downtown Goes Orange’. E evento aki lo ta di un taya mas chikito cu e meta pa crea un formato sostenibel, organizando actividadnan mas regular tur luna. P’esey riba 27 di April, Weststraat un biaha mas lo bay ta e centro di ambiente familiar tranformando Harbourwalk cuminsando for di 7:00 pm.
Sr. Ivan Diaz, Property Manager di Harbour House y Harbourwalk a amplia cu lo bay tin diferente kioskonan di artesania, benta di cuminda, lo bay tin popup restaurants, y entretenimento di DJ Caleto, musica ‘live’ di Acustica y varios otro presentacion di artistanan local.
E comision di ‘Downtown Reinventa’ ta gradici propetarionan den e area di Weststraat, Bazarrr, Lima Bistro, Acustica, DJ Caleto, y tur e artesanonan cu ta comparti e vision di revitalisacion di Downtown Oranjestad y cu sostene e iniciativa aki un biaha mas. E comision di ‘Downtown Reinventa’ ta hopi entusiasmo cu ‘Downtown Goes Orange’ y ta spera cu comunidad di Aruba pasa y disfruta di un ambiente unico riba Dia di Rey.
