Minister Arends durante e Conferencia di Clima y Energia a mustra cu cambio climatico no conoce frontera, y ta afecta nos tur  

ORANJESTAD (AAN):  Den e siman cu a pasa Aruba a co-organisa e Conferencia di Clima y Energia, caminda a tene diferente actividad y discurso den cuadro di cambio climatico y transicion pa energia renobabel.

Un conferencia cu a ser realisa den colaboracion entre Hulanda y Aruba caminda representantenan riba nivel diplomatico y mandatarionan di diferente pais den Caribe y Pacifico a participa na esaki. Como resultado di e conferencia a firma un acuerdo entre Hulanda, Aruba y Sint Maarten pa hunto traha riba un plan pa combati e efectonan di cambio climatico cu nos ta experenciando mundialmente. 

            Durante e conferencia, Minister Ursell Arends a hiba diferente discurso relaciona cu cambionan necesario y cu mester wordo efectua na Aruba como un isla chikito den Caribe, pa por absorba e efectonan negativo di e cambio climatico. A pone enfasis ariba e hecho cu Aruba ta rondona cu zona costal caminda awa ta parti di nos bida diario y ta algo esencial pa nos sobrevivencia y pa nos economia. A elabora tambe ariba e punto crucial cu actualmente ta trahando pa yega na solucionnan basa ariba naturalesa cu e meta pa aumenta e resilencia di nos naturalesa contra e cambionan climatico, cu nos a bin ta experiencia den ultimo añanan y cu tin impacto ariba nos medio ambiente en general.            Minister Ursell Arends a demostra tambe cu su meta ta pa sigui boga pa proteha nos playanan, expande nos parke marino, y salbaguardia nos mangelnan, nos bioversidad, pradonan di yerba di lama y nos rifnan di coral.

            “Aruba ta un isla chikito pero nos ta cla pa lidera den adaptacion climatico y haci un diferencia riba nivel local y global”- Minister U.A.

            Un di e aspectonan importante di e conferencia tabata e sesionnan di discurso na mesa, cu grupo di diferente expertonan y mandatarionan di paisnan Caribense. Minister Ursell Arends a lidera su sesion pa hiba e discusion interesante tocante e importancia di desaroyonan pa stimula sistemanan ecologico resistente.

            Durante e sesion aki a pone enfasis ariba e punto cardinal: cu e ta un responsabilidad di no solamente Gobierno pa atende cu esaki y purba na yega na solucionnan, pero tambe di e sector priva cu su debido aporte pa por yega na un impacto positivo na e resultado. Segun Minister Ursell Arends, cada un di nos tin un papel pa hunga y nos mester traha hunto, iniciativanan conhunto entre sector publico y sector priva mester ta central den tur nos plannan.

            “E pensamento principal tras di ful e discurso aki ta cu 'cambio climatico no conoce frontera', pasobra cambio climatico ta toca henter mundo, tur nacion, tur pais, tur cas. Pa Aruba, e elemento clave den iniciativanan di ambos clima y energia limpi ta den nos capacidad pa crea e conscientisacion pero e ta rekeri y exigi cooperacion mutuo entre e publico domestico, sector priva y nos Gobierno” - Minister U.A. 

            Pa completa e conferencia, a duna recorido rond di nos isla caminda a bishita diferente areanan di Aruba cu ta sumamente importante den cuadro di clima y energia. A bishita entre otro, nos saliñanan, parke solar y tambe Dump di Parkietenbos. 

            E conferencia a demostra cu islanan den Caribe ta experienciando e mesun problema den cuadro di clima y energia. Esaki ta nifica cu paisnan den Small Island Developing States (SIDS) por traha hunto na nivel profesional di colaboracion pa asina yega na solucionnan cu ta efectivo.