Lions Club preparando pa celebra su 75 aña di existencia:
ORANJESTAD (AAN) – Diahuebs 28 di Juli aki, Lions Club a yama un conferencia di prensa den cual su Presidente, Rubin Ponson, a hiba palabra.
Ponson a cuminza bisando cu den e aña aki, 2022, Aruba Lions Club ta cumpli 75 aña di existencia, sirbiendo e comunidad di Aruba, dia 2 di October venidero.
E aña aki, Aruba Lions Club y su miembronan ta preparando pa diferente actividad, pa celebra nan di 75 aniversario aki y Ponson a menciona cu e organizacion aki ta conoci pa su diferente proyectonan, y ta conoci cu durante e temporada di e virus tabata fastioso, y a dificulta Aruba Lions pa sigui cu e proyectonan aki, di manera optimal.
Pero asina mes Aruba Lions a sa di bin cu otro proyectonan e containernan di cuminda pa reparti entre e hendenan cu a pasa den temponan duro. Nan a reparti alomenos mil of mas pakete di cuminda pa personanan cu tabata den necesidad.
Den cuadro di e celebracion di 75 aña, señor Ponson a menciona, e biaha aki ta bin cu un proyecto pa recauda fondo, pasobra esaki ta locual ta laga Aruba Lions Club sobrebibi cu su proyectonan cu tin cu sirbi comunidad cune. Sin e fondo aki, nan no por haci nada.
Semper nan ta conoci pa e rifa di cas cual prijs conoci nan purba mantene pero e aña aki nan ta bay rifa un auto. Cu esaki nan ta enfoca mas riba e tempo moderno aki, unda ta papia hopi di autonan electrico, etc.
El a yama danki na e compania di auto concerni cu a yuda Aruba Lions Club grandemente, y premionan masha bunita cu nan por hinca den un rifa pa solamente e prijs cu comunidad a conoce cu e rifanan di cas.
Durante e finnan di siman cu ta bay bin, vooral e siguiente dos lunanan lo bay topa e miembronan di Aruba Lions den nan Jacket gel, na diferente parti di nos Isla pa nan por bende e ticketnan pa e rifa. Ponson a expresa cu cada persona mester por corda cu cada florin inverti den e rifa ta bay cien porciento bek den comunidad. Aruba Lions Club ta conta cu e sosten di comunidad cu e rifa aki.
E fecha cu e rifa ta bay hunta ta diadomingo 2 di October. Aruba Lions Club mes lo bay tin su celebracion cu algun invitado di Lions Internacional cu lo bin pasa algun dia cu Aruba Lions. Lo culmina e celebracion aki cu e rifa di auto cu lo ta dia 2 di October cu un actividad dilanti nan club mes, na Engelandstraat, cu musica, cuminda y bebida pa celebra hunto cu e pueblo. Pa atardi 6’or, lo saca e number ganador for di un tombola.
