ORANJESTAD (AAN): Diamars Formador Evelyn Wever Croes a reuni tambe cu Asociacion di Ingeniero y Arquitectonan Arubano.
Despues di e reunion, presidente di e asociacion Raffy Kock a trece dilanti cu e reunion a bay den un esfera placentero.
“Nos a logra entrega e 5 puntonan cu nos kier a entrega awe, cu ta inclui e parti di ‘Bouwbesluit’, Architectenregister, Educacion y ROPV”, segun Kock.
El a splica cu tabata importante pa presenta e puntonan importante, a proteccion di e ingeniero y arquitectonan y pa crea un economia basa riba conocemento y talento local.
“Nos tin hopi talento y actualmente door di e fase di proteccion, sea nos ta exporta nan pa otro paisnan, of na Aruba mes nan ta ‘struggle’ pa por tin un bon existencia”, segun Kock, kende a indica cu e asociacion a haya oido, unda cu nan ta den combersacion cu entre otro D.O.W y otro instancianan, pa por crea e base cu por empodera e hendenan tecnico den sector electrico, den sector di bouwkunde y di mecanico.
“Ta importante pa nan por tin un mercado sigura pa nan y pa nan siguiente generacionnan por disfruta di dje”, segun presidente di e asociacion.
