ORANJESTAD (AAN) -- Mirando e cifranan halto cu ta wordo menciona di AO na Aruba, debi na Covid-19 y su variante omicron, ta afectando sigur e mercado laboral,
ya cu tin absentismo tur caminda: supermercado, departamentonan publico, agencianan di supply, sector publico. Tin departamentonan di gobierno cu ta trahando cu menos cu mitad di e personal, segun DIARIO por a compronde. Tambe den sector priva, por ehemplo den Horeca, DIARIO tin entendi cu tin basta trahador cu AO na cas, pa motibo di e virus. Y asina tin mas lugar di trabao unda mayoria di trahador ta of AO, of den cuarentena, y esey tin para e makinaria laboral, y consecuentemente e economia, tanto den e empresanan como e economia domestico.
Sin duda cu e absentismo prolonga (depende di con duro e trahador haya e virus), ta afecta e produccion laboral, y incluso den e sector medico tin testnan y cirugianan cu ta wordo postpone, di acuerdo cu fuentenan di informacion.
E bida di cada persona, riba su mes ta birando pa cada ken su “normalidad nobo” y e propagacion sin precedente di e variante omicron, na otro paisnan ta causando incluso reduccion di personal y nada di straño tin cu na Aruba lo por sosode mescos.
E ta un situacion hopi dificil, despues cu na Aruba, por ehemplo, e economia tabata bayendo den franco recuperacion, cu algun ciudadano cu tabata desemplea a cuminza haya trabao, y cu e expectativanan tabata masha halto mes.
Y mientras tanto, leu cu e casonan cuminza baha, tur cos ta birando excesivamente caro na Aruba, y ta wordo pronostica cu prijsnan lo bira hopi mas halto mirando con halto e flete di productonan a bira banda di e tardanza cu tin pa nan yega Aruba. Tin productonan manera fruta y berdura cu hasta ta yega Aruba ya pa cuminza daña, mitad daña of putri.
Den e dianan aki por nota cu no tin scarcedad di awacati, pero prijs a bira di luho. Un awacati chikito den un supermercado grandi ta costando mas di 8 florin y esnan grandi entre 10 cu 12 y hasta 13 florin. Pues, omicron cu tanto hende ta considera “un simple griep” a bin bolter tur cos atrobe, y aunke tin hende cu ta purba di tapa e solo cu un dede, pasobra nan ta sinti trankil y sin panico, e realidad ta cu e situacion ta preocupante, global y localmente y cu mundo y e dushi Isla aki yama Aruba tambe ta dilanti un encrucihada di cual no ta parce cu lo sali aworaki.
