ORANJESTAD (AAN): Pueblo kizas a lubida caba, cu desde 2019 na Aruba tin ley cu ta haci un acto castigable pa bo core cu plachi number cu bo mes a traha.
Te con leu ta conoci, keto bay Departamento di DIMP no a presenta plachi number nobo pa vehiculonan cu ta trafica ariba e camindanan di Aruba, sinembargo diariamente por mira diferente forma di plachi number ta core rond riba camindanan, di number color oranje, te cu plachinan traha di carton y te hasta number traha di sticker vinyl.
DIMP a splica claramente cu e regla nobo desde 2019 ta prohibi esaki. Solamente esun oficial duna door di DIMP ta valido legalmente. Cualkier otro (hasta si bo tin papel den auto cu bo a paga e belasting full) no ta valido, y Polis por actua.
DIMP ta bisa cu na Aruba, ningun persona ta permiti pa traha plachi di number riba nan mes. Te cu aña 2018 Departamento di Impuesto tabata duna un carta di permiso pa e automobilista traha su mes plachinan ora esakinan no tabata den stock. Pero entrante 2019 esaki no ta e caso mas. Tur vehiculo di motor cu ta haci uzo di nos careteranan mester tin e plachinan cu Departamento di Impuesto a otorga.
E automobilistanan cu a pone plachi di number oranje cu blanco sea den forma di sticker, papel, carton etc. riba nan vehiculo ta cometiendo un acto ilegal y inhusto enfrente di esnan cu si ta cumpli cu pago di nan impuesto. Departamento di Impuesto a pone Cuerpo di Polis tambe na altura y ta pidi comunidad en general pa informa polis ora mira un vehiculo riba caminda cu plachi di number falsifica. Asina so por yuda caba cu e tipo di actonan aki cu no ta contribui na bienestar di nos pais.