Legendario futbolista Calulu Comenencia ta conta di su glorioso temponan di Futbol

Entrevista realiza den Stadion di Riff unda Calulu Comenencia a Marca su Historia. 

** Awe Diahuebs 9'or di anochi atraves di Telearuba canal 13, porfin PoetsTV por presenta e historico edicion di celebracion y reconocimento 100 aña Futbol di Curaçao na hermana Pais Curaçao, na unda legendario futbolista Carlos Calulu Comenencia den presencia di representantenan halto den e Mundo di Futbol a ser reconoci pa FFk, entre e 11 mihor futbolista den historia di 100 aña di Futbol di Curaçao.

   PoetsTV a realiza e viahe cu legendario Calulu Comenencia y a probecha di e ocasion unico pa entrevista Calulu Comenencia den e historico stadion di Riff, awendia Stadion Johnny Vrutaal. Pues e stadion cu Calulu Comenencia a cosecha su aplausonan pa su magnifico hungadanan cu su team di tur tempo na Curaçao, Sithoc.

   Awenochi durante edishon di PoetsTV, legendario futbolista Calulu Comenencia lo conta di su temponan glorioso, precies unda el a marca historia cu su talento extaordinaro riba tereno di Riff. Tambe su gran amigo, e conocido futbolista/cantante, Rignald Vidal lo recorda e grato recuerdonan di Calulu cu Sithoc.

   Su otro gran amigo Stanley Gijsbertha, porcierto ruman di leyenda keeper den (felis memoria) Ergilio Hato, lo conta di e parti humano y bondadoso di Calulu Comenencia. Mientras na Aruba e conocido ex-futbolista di FC Roma di Dakota, ta recorda Calulu su corto temporada den SV Dakota.

   Tambe ex-referee di FIFA, Dochi Lee, ta conta su experiencia como referee cu a fluit weganan cu Calulu riba tereno. Tambe e momento cu Minister di Deporte Endy Croes a sorprende Calulu Comenencia na su prestigioso Graficas Aruba y a honre cu un Plakaat di reconocimento den nomber di Pueblo di Aruba pa su gran logro na Curaçao y cu Aruba a bira su cas.

   Na final lo bay tin un invitado cu lo bay sorprende Calulu, kende lo conta un interesante storia di legendario Calulu Comenencia. No perde awenochi 9:00 pm na Telearuba Canal 13.