Home General Tur esnan cu ta duda den tuma e vacuna tin di bay...

Tur esnan cu ta duda den tuma e vacuna tin di bay busca informacion corecto y di expertonan

66
0
SHARE
- Advertisement -

ODEA contento cu asina hopi enfermero a vacuna

ORANJESTAD (AAN): E organizacion local di Enfermeronan na Aruba, esta ODEA, a indica den fin di siman cu nan ta gradici tur cu a acepta pa ta e promenan pa ricibi nan vacuna conta Covid-19.

   “Nos como nurse ta prome yama pa ricibi e vacuna Covid-19 pa garantisa cu nos por sigui duna e cuido sin afecta nos mesun salud, salud di nos famia y nos comunidad,” e boletin ta indica.

   Segun ODEA, e vacuna no lo caba cu e virus di Covid-19, pero sigur nan a drenta e era di por combati e pandemia aki cu menos peso riba cuido medico.  Nan como nurse for di momento cu a cuminza ricibi les, como studiante nan a ricibi e prome vacuna cu nan profeshon ta exigi pa nan tuma, cu ta Hepatitis-B.  Nan nunca por a pensa cu lo experiencia un pandemia cu awor nan ta para dilanti e decision pa tuma vacuna contra Covid-19.

   “Manera nos por a wak tur trahando den cuido no ta duda pa tuma esaki. ODEA ta stimula pa tur persona cu ta traha directo of indirecto den cuido pa tuma e vacuna aki pa na prome luga proteha bo mes. Aruba awor mas cu nunca tin mester di cada un profesional pa por sigui den e lucha contra e virus aki, cu a bin pa keda y a afecta mundo henter.”

   E organizacion ODEA ta pidi comunidad pa ademas di tuma e vacuna aki, pa nos sigui cuida y mantene nos mes na e protocolnan di Covid-19, na tur momento. Nan ta pidi tur hende pa registra pa asina yuda e funcionarionan di DVG cu ta registra y planea e accion di vacuna aki por cana na un manera eficiente pa garantisa cu mayoria poblacion di Aruba por ricibi esaki den e tempo stipula.

   “Sigur nos lo tin cu respeta cada persona cu no ta sinti nan mes cla pa ricibi e vacuna. Pa awor esaki ta bay den forma voluntario. Lo yega su momento cu pa bo por sigui move liber, traha y biaha, unda bo persona lo mester tuma e vacuna aki. Corda con por ehempel ta persona nan cu ta traha den cuido so tabata haya e vacuna Hepatitis-B.  Nos no tabatin e option si nos kier bira un nurse. Manera bo drenta opleiding, prome bo cuminsa bay stage bo mester a ricibi bo vacuna di Hepatitis-B.”

   Desde 2003 Aruba a tuma e decision pa inclui esaki den vacuna di nos muchanan manera nan nace. Esaki debi cu tur Universidad rond mundo ta exigi esaki pa bo por inscribi na e Universidad.

   ESNAN CU TA DUDA:

   Na tur cu ta duda y/of no ta sinti nan mes cla pa ricibi esaki, ODEA kier encurasha nan pa busca e informacion corecto pa bo mes, di expertonan den e materia. Di personanan cu a ricibi e vacuna aki caba.

   “Nos ningun ta mescos. Tur hende por sinti diferente, pero no lo bira mes malo cu si bo no tin e vacuna. Nos tur tin e libertad di dicidi pa nos mes. Ta importante pa bo ta bon informa pa por tuma e decision corecto cu bo ta sinti bo mes bon.”

   ODEA ta felicita tur enfermero y tur cu ta traha den cuido pa ta e ehempel pa tur cu ainda ta den duda. Nan ta desea tur profesional cu ta traha den cuido hopi forsa pa hunto sigui dilanti den e pandemia aki.

   “Nos lo vence mescos cu Florence Nightingale y tur nos dilanti a vence un pandemia. Laga nos sigui practica loke nos a siña con nan promer lugar nos mester cuida nos mes pa nos por cuida tur otro. Nos ta desea nos coleganan di DVG tur clase di exito den guia e plan di accion aki di vacuna Aruba hunto cu tur stakeholders den cuido. Den e pandemia aki nos ta un y cu un solo meta, brinda nos comunidad e mihor cuido cu nos por.  Nos ta tuma e vacuna pa nos por keda cuida cada ciudadano cu ta biba ariba nos dushi isla di Aruba y tambe nos turistanan. Ban sigui registra pa asina mayoria di persona bibando aki na Aruba por ta vacuna.”

 

- Advertisement -

DUNA COMENTARIO

Please enter your comment!
Please enter your name here