Home Gobierno Minister Presidente cu yamada enfatico na comunidad y specialmente e 60 plussers

Minister Presidente cu yamada enfatico na comunidad y specialmente e 60 plussers

275
0
SHARE
- Advertisement -

Esnan cu no a registra ainda hacie pa tuma e vacuna:

ORANJESTAD (AAN) – Dialuna, Minister Presidente mr. Evelyn Wever-Croes, den e sala di vacunacion na Teresita Center unda e 60 plussers a cuminza haya nan vacuna, a expresa na den e conferencia di prensa, cu Covid a dal Aruba hopi duro, tambe den e aspecto social.

“Hopi hende ta depende di pakete di cuminda. Un den cada cinco ciudadano di nos pais, ta depende di e pakete di cuminda di Cruz Cora of di Fundacion pa Nos Comunidad.

Nos tabata tin aña pasa 11.650 ciudadano cu a haci uso di fase, cu ta e asistencia financiero na esnan cu a perde trabao; y nos tin aworaki ainda, un cantidad di 20 mil persona cu nan trabao ta depende di e loonsubsidie. Si no ta pa e subsidio di salario tambe nan lo a perde trabao” Prome Minister a relata.

E urgencia pa Aruba cuminza recupera su economia, su forza economico, ta enorme. “Y awe, cu e vacunacion aki nos ta duna e prome paso” Premier Wever-Croes a reitera.

Prome mandatario a haci un yamada enfatico na henter comunidad pa registra y tuma e vacuna.

“Por fabor registra! Bo por registra atravez di e app di DVG of bay MFA, nan ta yuda bo registra eynan. E ta hopi importante pa bo registra, pa asina bo ta den e sistema. Special esnan mayor di 60 aña, esnan cu condicionnan di salud manera mi a caba de describi, por fabor registra pa bo wordo vacuna mas lihe posible”.

E dignatario ta sugeri esnan cu tin duda ainda, pa consulta cu nan docter di cas y laga e trankiliza nan y bise si ta prudente pa tuma e vacuna of no.

“E yiunan mi ta pidi por fabor ban yuda nos grandinan, ban yuda tur esnan den e grupo vulnerable pa nan por registra, pa nan bin na remarca pa e vacuna aki. Pakico nos ta haci esaki? Pasobra nos kier reconstrui nos pais bek, nos kier e Aruba bek manera e tabata prome cu Covid-19. Pasobra nos ta stima nos mes, nos ta stima nos famia y nos ta stima Aruba”, e mandatario a expresa pa conclui.

 

 

- Advertisement -

DUNA COMENTARIO

Please enter your comment!
Please enter your name here