Hues mester scucha Auditorio General den caso WEB

    394
    0
    SHARE
    - Advertisement -

    Pa prome bes den historia Hues mester dicidi riba salario y pandemia

    *Ley bon maneho di placa directamente na peliger den caso dilanti Hues

    *Caso WEB ta mishi cu bienestar di Aruba den situacion excepcional Covid-19

    ORANJESTAD (AAN) — Pakico pueblo den un sistema democratico ta vota pa un Gobierno y kico ta wordo spera di Gobierno segun reglanan di bon gobernacion?

    Esaki ta e pregunta central den e caso cu trahadonan di WEB a cuminsa pa bay contra e decision di Gobierno Wever-Croes cu tur trahado directamente den servicio di Gobierno of di companianan di gobierno, mester reduci salario di nan trahadonan den e situacion cu Covid-19 a crea y den cual e pais Aruba mester percura pa tur ciudadano por come y tin un base pa un bida humano.

    E caso a wordo entama dor di e sindicato di trahadonan di WEB pero no ta salario di e trahadonan cu no ta den rangonan mas halto di WEB so ta na discusion pero salario di henter WEB y di tur servicio di gobierno, pasobra ley ta conta pa uno y pa tur segun democracia.

    Den e caso aki hopi tema importante ta bini dilanti y merece di atencion pasobra ta trata aki di un caso historico, cu tin su origen den un malesa cu tin henter mundo paralisa y den shock y cu ta exigi na tur pais pa medidanan wordo tuma.

    Hulanda a presenta e exigencia cu cual Gobierno Wever-Croes mester cumpli si Aruba kier haya asistencia financiero di Reino den e situacion cu e pandemia a causa riba su mes.

    Informacionnan concreto cu DIARIO a ricibi ta mustra cu ta trata di un prestamo importante sin interes cu Aruba lo mester paga na Hulanda cu na su turno ta bay subi su debe nacional pa e tin placa pa su propio asuntonan.

    Hulanda a bini cu exigencia cu Aruba ta baha Aruba su gastonan debi na e desaroyonan na Aruba, cu a haci cu for di 2014 Hulanda a splica Mike Eman, cu gasta placa sin midi, a termina.

    Parti importante di e prestamo cu Hulanda ta duna Aruba no ta debi na Covid-19 pero na e debe nacional cu Mike Eman a laga atras y Hulanda no kier haya su mes den ripiticion cu dentro di algun luna ta bolbe bati na porta pa mas prestamo.

    Informantenan riba tereno constitucional ta mustra DIARIO cu Gobierno Wever-Croes tin deber pa cumpli cu necesidadnan di Aruba den e tempo di pandemia. Esaki no solamente ta encera medidanan manera Toque de Queda pero tambe riba tereno financiero y a base di leynan cu ta exigi pa un gobierno hiba un bon maneho financiero cu ta basa riba e placa cu e pueblo tin na su disposicion pa haci gasto.

    Aruba a keda sin economia loke ta haci cu Aruba mester baha su gastonan di awa y electricidad y tur otro gasto cu no tin placa pa paga mas.

    E decision cu mester baha e gastonan di personal di Gobierno di parti di Hulanda pues ta corecto pasobra informacion basa riba cifra ta mustra cu actualmente Aruba no tin entrada pa cubri tur gasto.

    Segun informacion e pregunta grandi cu mester contesta den Corte ta, si gobierno di Aruba a base di Constitucion y Ley di Contabilidad, no mester tuma e medidanan cu el a tuma.

    Pa contesta e pregunta aki, mester di Algemene Rekenkamer Aruba, Auditorio General di Aruba, cu tin e derecho di bay investiga tur cifra di WEB, investiga tur gasto y entrada cu WEB lo tin pa mira con esaki ta afecta entrada di WEB.

    Informantenan ta indica cu den e pandemia actual, si Gobierno no actua, WEB tambe ta na peliger y mester mira su futuro.

    Economia di Aruba no por ta produci na e momentonan aki e placa na awa y coriente cu e tabata produci pa WEB ora tur hotel tabata yen y empresanan na Aruba por a gasta awa y coriente manera tabata e caso. Trahadonan cu a keda cu hamber ora nan a perde trabou, awor no tin placa pa gasta na awa y coriente manera antes.

    Segun informantenan Hues no por aplica solamente leynan riba tereno social den e caso aki, ya cu ta trata aki di un caso compleho den un situacion di emergencia internacional y pa cual no tin hurisprudencia na Aruba.

    Pues pa prome bes den historia Hues mester tuma un decision den un caso sin ehempel (hurisprudencia) na Aruba, den cual Hues mester deshaci di situacion di Gobierno den un situacion di emergencia nacional y mundial y cu directamente lo determina kende ta keda responsabel pa bon gobernacion, cu ta hancra den leynan di e pais.

    “Aki no ta trata di un mediador y gobierno. Aki ta trata di un pais cu a scoge un gobierno pa maneha e pais manera ta maneha un empresa,” informantenan a indica.

    Nan a mustra cu den e caso aki Hues mester scucha e organonan di mas halto di estado y sigur Algemene Rekenkamer Aruba, cu mester presenta cifra a base di un investigacion di administracion di WEB, cu segun Ley Algemene Rekenkamer Aruba por controla.

    “Kico lo pasa si a base di e decision di Hues, Gobierno mester revoca tur reduccion di salario?” Esaki ta e contesta cu mester subi mesa segun informantenan cu ta di opinion cu prome cu Hues dicta sentencia, mester scucha Algemene Rekenkamer Aruba pa atende cu e resultadonan desastroso cu ta na horizonte pa Gobierno di Aruba y sigur pais Aruba.









     

    - Advertisement -

    DUNA COMENTARIO

    Please enter your comment!
    Please enter your name here