Henter waf di Barcadera por haya alivio si acaso WEB Aruba NV cuminza usa gas LNG

    472
    0
    SHARE
    - Advertisement -

    ORANJESTAD (AAN): E huma… e holor… y e malestar cu nan a sufri di dje, ta algo cu na numeroso ocasion a sali den corant y na TV.  Ta e molester di huma riba Waf di Carga na Barcadera.

       Pa hopi aña caba e reclamo di trahadornan riba Waf di Barcadera ta cu e Heavy Fuel Oil (HFO) cu e planta di awa y electricidad di WEB Aruba NV ta usa pa genera coriente, ta culpable pa e huma cu ta sali di nan planta y ta ‘plama’ riba e tereno na Barcadera.

       Aña pasa mes, Sindicato UPA a hiba Astec den un caso sumario, pasobra despues di hopi aña wardando pa haya un rapport encuanto e calidad di aire riba Waf di Barcadera, te ainda no por a haya esey.

       Hecho ta cu desde cu Container Haven a muda for di Playa pa Barcadera, cu e trahadornan di Astec cu ta atende bahamento di carga for di barconan, ta haya molester inmenso di e huma cu ta sali for di e pipanan di e planta di awa y energia di WEB Aruba NV.

       Tin biaha e huma ta asina diki, cu hasta visibilidad ta worde afecta riba e Waf.  Trahadornan tabata haya molester di stoma, mareo, y problema respiratorio.  Diripiente e cantidad di casonan di trahadornan cu ta bay malo cas cu A.O. a subi.

       Na comienzo a haci analisis di e calidad di aire, y semper tabata sali na cla cu e particulanan den e aire cu nan ta respira, ta cay bao di e margen di ta aceptable pa un ser humano.  Pero pa bo keda hala rosea asina oranan largo den dje, e tabata sigui molestia nan.

       Te ora cu un experto a yega, y a mira cu varios muraya, y tambe material di hero cu tin riba Waf di Barcadera tabata haya un tinte berde riba nan.  E por ta un indicacion cu por tin sulfuric acid hopi halto den aire eynan.  Na Hulandes e ta conoci como “Zwavelzuur”.

       A pidi un investigacion relaciona cu esaki, y Astec a laga un compania haci e analisis y na final a entrega e compania e rapport di analisis.  Dado momento el a bira asina serio, cu hasta e empleadonan a dicidi cu ora cu tin huma pisa riba Waf di Barcadera, ora cu casi no por papia cu otro debi na huma diki, nan kier pa Astec stop tur trabao y laga e trahadornan bay cas e dianan ey.

       GAS LNG:

       Awor tin e posibilidad cu kizas lo bay tin un planta pa warda gas tipo LNG riba tereno di refineria na San Nicolas.  Esey automaticamente lo por suministra gas tambe pa opera e planta di awa y electricidad di WEB Aruba NV.

       Hecho ta cu gas LNG ta uno ‘limpi’ y ‘economico’.

       Gas LNG ta un fuente hopi economico pa e necesidad di genera energia.  Na Merca mes, esaki ta un parti grandi di e gas cu ta wordo usa como materia prima pa fabrica cantidad di producto.

       Mas y mas central nobo di produci coriente ta usando gas LNG tambe awor.  Nan ta escogiendo e gas aki pa produci coriente na un forma mas limpi, y tambe e plantanan bieu ta wordo re-converti pa por usa gas LNG, debi cu e gas limpi aki ta permiti e plantanan aki cumpli mas facilmente cu e normanan nobo di proteccion di medio ambiente.

       Gas LNG ta un di e combustiblenan mas sigur y limpi cu ta existi.  E ta emiti menos contaminacion compara cu otro fuentenan di combustible fossil.  Ora cu gas LNG ta kima, e ta produci principalmente carbon dioxide y vapor di awa, e mesun substancia cu un ser humano ta saca for di su rosea.

       Compara LNG cu otro tipo di combustible, e gas aki ta uno cu ta saca menos carbon dioxide na aire ora di kima, y pesey rond mundo e ta wordo describi como un gas “clean and economical”.

       Si acaso e compania Eagle LNG establece su mes, y cu via di RdA nan logra haya un contract pa suministra gas LNG pa WEB Aruba NV, no ta djis pueblo lo bay disfruta di tarifa abao di awa y coriente, pero tambe trahadornan riba tereno di Waf di Barcadera lo por haya porfin mas alivio y cu lo no tin huma peligroso mas ta plama eyriba.

     

    - Advertisement -

    DUNA COMENTARIO

    Please enter your comment!
    Please enter your name here