Mihor bo mira rond bon prome cu bo drenta cas
ORANJESTAD (AAN): Diadomingo anochi pa 11:00 pm, un homber a yama Polis pa raporta un caso di atraco den Profesor Lorentzstraat na Playa.
El a bisa cu un persona a atraca y bay cu tas di su casa, na momento cu el a yega y habri porta di cas y kier a drenta paden.
E persona cu a rek su tas y bay cune, a subi un bicicleta y a cuminza core bay direccion pabao rumbo Madiki.
A duna informacion cu e atracador ta bisti na preto, y tin un petchi riba cabez.
E unidad di Polis di Playa a yega na e cas, y asina a cuminza busca den vecindario pa e sospechoso, pero sin ningun resultado.
Asina a tuma e denuncia oficialmente, y a notifica Central di Polis precisamente kico a socede. Awor Polis tin atencion pa e caso.
Un bon recomendacion, pa ora bo ta habri porta di bo cas, keda alerta y sigui check kende por ta ey cerca of kizas a sigui bo sea na pia of den auto.
