Home Editorial Aruba na man di un lider capaz entre Carnaval 2020 y Carnaval...

Aruba na man di un lider capaz entre Carnaval 2020 y Carnaval 2021

288
0
SHARE
- Advertisement -

Editorial

Segun tradicion, awe nos edicion mester tabata yena cu articulonan y potretnan di eleccionnan di Reina, di eventonan rond Aruba pa celebra fin di siman di Carnaval.

Na Februari 2020, mientras comunidad di Aruba hunto cu turistanan tabata prepara pa subi caya pa celebra Carnaval, DIARIO tabata na careda.

Mientras Aruba tabata celebra Carnaval 2020, DIARIO como e unico matutino cu a logra durante mas cu 40 aña  informa y prepara Aruba pa tur desaroyo, tabata skirbi textonan pa guia Aruba pa e periodo den cual e Aruba cu nos a conoce, lo a stop di existi.

Nos trabou mientras Carnaval 2020 tabata culmina tabata, sigui tur informacion mundial pero tambe pasonan di Gobierno di Aruba, cu a haya un tarea historico cu tabata guia un Aruba, sin economia, sin entrada di placa, sin mayoria di e cuponan di trabou, cu mayoria di su empresanan mas grandi incluyendo hotelnan cera.

Awe nos ta mira atras riba un scenario, pa cual nos mester a prepara Pueblo di Aruba cu awa den nos wowo y angustia den nos alma, pasobra e realidad lo a trece morto, malesa, dolor, hamber y miseria pa Aruba y henter mundo cu lo a wordo confronta cu un situacion pio cu Segundo Guera Mundial.

Celebracion di Carnaval 2021 ta exigi nos pues hunto cu Pueblo di Aruba, observa kico a pasa pa nos por sigui cana.

E ta exigi nos  na prome luga yama danki na Dios pa tur e bendicionnan cu Aruba a ricibi durante e prome aña di pandemia.

Nos ta gradici Dios cu el a entrega nos un lider, cu por a dirigi Aruba na e momentonan mas scur di nos historia durante cual nos mester a bringa un enemigo desconoci y invisibel pa henter mundo, cu a basha abou.

Nos ta gradici Dios pa un gobierno, cu a demostra su capacidad y a tuma medidanan pa scapa bida di Arubianonan pero na mes momento percura pa asistencia financiero pa comercio por a sigui, pa trahado no a keda sin pan riba mesa, pa e comunidad por a sigui.

Hunto cu Hulanda, Gobierno Evelyn Wever-Croes a permiti nos sigui dilanti sin e desesperacion cu a marca tanto pais grandi na mundo.

Prome Ministro Wever-Croes a yena nos cu animo mientras el a sigui traha pa un dia nos drenta e normal nobo.

E fin di siman aki no tin celebracion di Carnaval. Pero si tin entrada di e vacuna cu ta e arma contra Covid-19. Si tin miles di sobreviviente, bida cu a logra scapa door di actuacion rapido.

Di Carnaval 2020 pa Carnaval 2021, Prome Ministro Wever-Croes, e prome dama cu a dirigi Aruba, a entrega nos su trabou, dificil pa wordo iguala den nos historia den e situacion mundial cu a presenta.

Di Carnaval 2020 pa Carnaval 2021, Aruba ta en espera di proyectonan cu ta wordo desaroya, di trabou cu ta wordo crea y di speransa nobo pa futuro!

- Advertisement -

DUNA COMENTARIO

Please enter your comment!
Please enter your name here