Peligernan grandi den economia scondi

    900
    0
    SHARE
    - Advertisement -

    DIARIO ta uni investigacion periodistico na rapportnan oficial

    *Alivio fiscal a habri caminda pa atende cu un menasa serio

    *Peso pa entrada nacional y negoshi honesto y ayudo pa crimen 

    ORANJESTAD (AAN) — Aruba ta enfrenta uno di su pio momentonan pa economia, empresanan, entrada pa trahado y bienestar general den e situacion cu e coronavirus nobo a crea.

    Un scenario cu ni e planificacion mas pesimista lo por a pinta, a bira realidad y awe mester wordo soluciona door di gobernacion.

    Pa atende diferente tema, DIARIO a uza informacionnan di expertonan cu a mustra cu no ta awe cierto problemanan a haya nan origen. Mas bien e problemanan tabata presente pero no a capta atencion di publico.

    E impacto di e coronavirus nobo tabata asina fuerte,cu el a exigi medidanan pa Aruba por recupera.

    A base di rapportnan cu DIARIO ta uza pa yega na conclusionnan cu ta wordo presenta na lectornan, DIARIO a realisa investigacionnan y a atende cu expertonan cu ta indica cu medidanan cu Gobierno a introduci awor, por bira e punto di salida pa atende situacionnan peligroso riba tur tereno pa Aruba.

    Manera a wordo indica, uno di e enemigonan di situacion economico, financiero y di siguridad na Aruba ta negoshi scondi cu ta uni den e asina yama “economia informal”.

    Ta trata aki di negoshi cu ta wordo haci na e pais den secreto. No ta paga belasting, no ta inscribi na Camara di Comercio y no ta duna popularidad na placa cu ta circula y asina ta crea un economia yama “shadow economy” cu mundialmente ta motibo pa organisacionnan importante bati alarma.

    Competencia ta wordo crea pa empresanan cu ta haya nan mes den problema, ta paga menos belasting y hasta mester manda empleado cas pasobra otro ta abusa.

    Hasta e Fondo Monetario Internacional, IMF, tin basta tempo ta mustra gobiernonan rond mundo con importante ta, pa tuma medidanan cu ta haci posibel pa hende honesto por tin entrada cu nan negoshi chikito sin peso grandi di belasting, cu ta uno di e motibonan di negoshi scondi.

    Pero hopi ciudadano honesto no ta realisa, cu ta hustamente e mundo di negoshi chikito ta crea un competencia inhusto pa comerciantenan pero tambe peliger grandi hasta pa siguridad di ciudadanonan na Aruba ya cu den e mundo di negoshi chikito, negoshi criminal tambe ta sconde.

    Informantenan a mustra DIARIO cu a base di e situacion cu e coronavirus nobo a crea, Ministro di Financia y Economia a introduci alivio fiscal. Esaki ta habri caminda pa e negoshi chikito por brinda un salida pa hende cu perde trabou uni nan mes na trahadonan cu riba nan mes ta crea nan entrada, pues na forma independiente.

    Sinembargo, e alivio cu nan ta ricibi, ta habri caminda pa nan por gana placa na forma honesto sin sconde pa servicio di belasting y tambe pa Polis.

    E problema cu e negoshinan scondi ta crea pa comercio local, a bini dilanti den diferente rapportnan durante e ultimo decada na gobierno y tambe den encuentronan di entre otro organisacionnan di comercio y gobierno.

    Awor cu Gobierno a crea e incentivonan fiscal, mester cuminsa actua pasobra manera expertonan ta indica, negoshi peligroso cu ta causante di hasta actonan criminal, ta sconde den e mundo di economia scondi, e economia di sombra, cu tin resultadonan riba tur tereno pa Aruba.

    Pasonan contra negoshi di sombra ta deshaci tambe di inhusticia caminda tin hende ta gana hopi placa na forma scondi y na mes momento ta abusa di medidanan social cu ta wordo tuma pa asisti e poblacion.

    “Ilegalnan ta participa den negoshinan scondi. Crimen ta wordo organisa den negoshi scondi di articulonan prohibi. Fondonan di pueblo no ta haya entrada. Hende ta intercambia produccion pa reemplasa actonan comercial,” informantenan ta bisa.

    For di 2014 a pidi Gobierno pa actua. E situacion mundial y local a empeora den e coronavirus.

    Gobierno a tuma medidanan corecto di alivio fiscal pa negoshi chikito. Esaki awor mester bira apertura pa trata “economia di sombra” cu man duro, informantenan a indica.

    - Advertisement -

    DUNA COMENTARIO

    Please enter your comment!
    Please enter your name here