Home Editorial “Aruba por” tabata e inspiracion mas grandi di Betico

“Aruba por” tabata e inspiracion mas grandi di Betico

303
0
SHARE
- Advertisement -

Ora papia di un lider nacional, ta papia di un persona cu na un forma unico a inspira y guia un pueblo pa un logro.

Historia di Aruba te Siglo 20, no a duna e Arubiano estimulo pa e descubri realmente “ken e ta” y “kico e por”. Na entrada di Siglo 20, Aruba a cuminsa lucha pa e para riba su propio pia den Reino Hulandes.

E lucha pa autonomia di Aruba, tabata mas cu un asunto constitucional. E tabata un anhelo di e Arubiano pa duna prueba di loke e por produci, realisa, alcansa. E tabata un deseo di e Arubiano pa pone un fin na e cualificacion cu tabata wordo duna na un Arubiano como ciudadano di e Reino Hulandes.

E lucha a fracasa den prome instante, ora Statuut no a contene e autonomia di Aruba pero a somete Aruba na condicion di minoria y dominio di Antia cu tabata na prome luga Curaçao.

Na 1971, Betico Croes a bini dilanti na un momento cu emancipacion tabata e palabra central den comportacion mundial.

Betico Croes a presenta un vision nobo pa emancipacion, autonomia, di Aruba, cu tabata Status Aparte.

Historia ta splica con Reino a hari. Antia Hulandes a hari. Betico Croes no a entrega su lucha na ningun compromiso, pero a sigui traha riba formacion di un Pueblo.

Un lider, manera nunca Aruba a conoce te awe, a entrega e Pueblo di Aruba un sentido di balor nobo. “Ken nos ta” a haya contenido den e Arubianismo cu Betico Croes a propaga.

“Chikito y simpel, pero respeta,” ta e Himno y e vision basico di Betico Croes, cu a pone un fin na e sentido di impotencia cu te na e momento, historia a uza den caso di Aruba.

“Kico nos por” a duna e Arubiano animo pa deshaci di loke semper e mester a acepta.

Ta den e ambiente aki, DIARIO a mira luz. Jossy Mehsen Mansur ta ehempel di e Arubiano, cu a entrega na su pais, su talento, su forsa  y su ideal den e lucha pa Status Aparte.

Cu DIARIO, na Papiamento di Aruba, e Arubiano no tabata depende mas di medionan di comunicacion dirigi y imprimi pafo di Aruba y den cual e Arubiano tabata “coresponsal”.

Riba tur tereno por mira con Arubianonan a cuminsa uza nan talento pa crea un Aruba autonomo, respeta den Reino. Un Aruba, cu ta capaz pa para riba su propio pia y busca e miho cu futuro por ofrece.

Esaki ta e herencia grandi di Betico Croes, kende te awe ta splica nos, cu nos por alcansa tur loke nos kier logra, como Arubiano, como un Pueblo digno di respet mundial!

- Advertisement -

DUNA COMENTARIO

Please enter your comment!
Please enter your name here