Home Editorial Reuni den e famia Aruba, DIARIO ta yama danki!

Reuni den e famia Aruba, DIARIO ta yama danki!

144
0
SHARE
- Advertisement -

Awe cu celebracion di uno di e fiestanan mas bunita cu mundo a adopta di e pueblo Mericano, DIARIO ta reuni den e gran famia di Aruba pa yama danki, refleha riba e aña cu ta drenta su fase final, y entrega na historia e lucha cu Aruba a hiba den un 2020 marca pa e pio crisis di historia mundial moderno.

Na caminda pa final di 2020, DIARIO a dicidi pa uza e dia aki, pa yama danki na Creador, yama danki na e famia di Aruba cu como famia a hiba un lucha historico y mester reconstrui e pais, cu a wordo seriamente afecta pa e pandemia causa pa e coronavirus nobo, SARS-CoV-2 of Covid-19 manera el a sali continuamente den noticia.

Ta e situacion excepcional cu a marca bida na Aruba na 2020, a haci cu nos a dicidi pa uza awe riba e dia cu famianan ta uza pa reuni y yama danki, dedica nos edicion na un forma special na tur cu a haci posibel pa den e situacion mundial, nos tin animo y motibo pa sigui lucha pa e futuro cu hunto nos lo bay crea.

Nos ta mira atras riba e momento cu mundo a wordo informa di e atake di un malesa mortal cu ta menasa hende y tur siguridad humano.

Mientras Covid-19 tabata plama rapidamente rond mundo, lagando atras destruccion y morto, panico a podera di hende sea cu hende kier a expresa esaki of kier a sconde su sentimentonan.

Dirigentenan a haya un tarea nobo y mester a pone nan mes como hende un banda, pa actua na defensa di bida humano na prome luga.

Economia mundial a wordo destrui. Produccion mundial a wordo afecta. Entrada a baha na un nivel desconoci den historia moderno. Ciencia medico tabata na careda pasobra no tin remedi no vacuna contra e malesa.

Hende a bira peliger pa hende y lidernan mester a bini dilanti pa introduci reglanan cu a bay contra tur loke hende tabata considera felicidad y regla.

No duna otro man, no reuni cu otro mas, cera negoshinan, keda cas, no brasa otro, no sunchi. Mester a stop tur fiesta, tur encuentro publico, schoolnan a cera, grandinan isola, negoshinan cera, aeropuerto cera, hotelnan cera, trahadonan sin trabou,  toque de queda!

Cuido medico mester a wordo reforsa. Mas trahado cu directamente mester a enfrenta personanan afecta. Polis, Guardacosta y tur otro miembro di autoridad den accion special pa defende hende contra su mes.

Dirigentenan di pueblo mester a lubida nan mes pa por a actua, confronta pueblo cu un realidad penoso y asumi responsabilidad pa e pais por a sigui cana.

Despues di e prome atake, a sigui e segundo atake mientras mester a sigui dirigi Aruba pa un futuro, basa riba un normal nobo pero tambe un fundeshi completamente nobo.

Fondonan special mester a wordo crea pa trahado cu a keda sin trabou. Empresanan cu no tabata tin entrada pa paga nan trahado. Gobierno mester a tuma medidanan pa Aruba por a sigui cana.

Awe ta Thanksgiving. Aruba ta yama danki na Creador pa Su asistencia ora mundo a basha abou. Aruba ta yama danki na tur Arubiano, cu a uni den e lucha pa sobrevivencia y pa traha riba un futuro nobo.

Awe Aruba ta yama danki na dirigentenan ehemplar, cu a marca 2020 manera un dia historia lo trece  dilanti.

Awe Aruba ta yama danki na e heroenan cu a enfrente tur peliger pa scapa bida di Arubianonan.

Awe DIARIO ta yama danki na Aruba cu a acepta DIARIO como su fuente di informacion den sistemanan di emergencia cu nos mester a aplica pa sigui traha.

Awe Thanksgiving 2020, nos ta mira dilanti na yegada di e vacuna, na realisacion di esfuersonan pa debolbe Aruba su economia, su entrada, su base den un normal nobo cu lo ta punto di salida pa futuro!  

- Advertisement -

DUNA COMENTARIO

Please enter your comment!
Please enter your name here