Home Editorial Mucha como elemento principal den creacion di futuro

Mucha como elemento principal den creacion di futuro

43
0
SHARE
- Advertisement -

Siglo 20 a caracterisa su mes pa su anhelo di emancipacion riba tur tereno. Cantidad di pais a busca nan autonomia y hende a busca un contenido digno pa hende sin tene cuenta cu rasa, religion, sexo y tur forma cu ta stroba un hende desaroya su mes segun su capacidad y talento.

Den e proceso aki, e mucha tambe a cuminsa bini dilanti. E mucha, cu na inicio di Siglo 20, tabata crece den un situacion di problema serio y sin ningun derecho riba un opinion, gusto propio.

Con serio e problema di muchanan tabata, naturalmente tabata mara na custumbernan local, cultura di cada pueblo. Riba un linea general, sinembargo, e mucha no tabata tin derecho pa scoge su propio destino.

Den mayoria di caso e mucha tabata wordo forsa pa sigui e bida cu su mayornan tabata desea. Mucha homber tabata sigui paso y profesion di nan tata mientras e mucha muhe tabata wordo educa pa bira esposa of si e no casa, e yudansa general di famia.

Con feliz  e mucha tabata realmente? Mayoria di hende lo bisa cu no tabata tin epoca mas feliz cu tempo di mucha. Cu esaki den hopi caso no tabata e caso, ta wordo confirma pa e necesidad di introduci Derechonan di Mucha.

Awe con feliz e mucha ta? E mucha tin tur derecho, pero e derechonan aki ta su realidad den bida di tur dia?

2020 na un forma special ta pidi atencion pa e mucha durante un aña, cu tabata tin impacto enorme riba e mucha.

Covid-19 a cambia bida di mucha cu na cierto momento no por a bay school mas. Nan mester a keda cas. Pa un grupo demasiado grandi di mucha, e hecho cu nan tabata isola y for di bista di otro hende, tabata tin resultado grave.

E resultado mas doloroso di isolacion cu SARS-CoV-19 por tabata tin pa un grupo cu awor na paisnan civilisa ta haya atencion special, tabata maltrato, abuso sexual y hasta maternidad di mucha cu no por a comprende kico ta pasa cu nan curpa.

Awe profesionalnan mester duna asistencia na mucha homber y muhe, cu a wordo abusa of maltrata durante isolacion, rond mundo.

E virus a crea un mundo di angustia pa e mucha, cu no por a bay school mas, mester scucha storianan di peliger cu cual adulto tin problema pa atende.

E mundo cu e conoce a basha abou. Miembronan di su famia a bira un peliger pa otro. No mas sunchi, no mas brasa, distancia, medida.

2020 ta entrega Aruba un tarea importante. Mientras ta planifica e futuro nobo, mester planifica y restructura e dirigentenan, e participantenan, e trahadonan, e basa humano cu lo ta central den e restructuracion.

Sin e ser humano, nada por sosode. Pues mester bay yuda y guia e sernan humano cu mañan ta encarga cu comunidad.

Enseñansa ta hunga un papel importante den e acuerdo entre Aruba y Hulanda pa restauracion di Aruba. Pero no ta gobierno so ta encarga cu e trabou, cu ta responsabilidad di henter comunidad.

Ban cuminsa awe. Ban duna contenido den tur gremio, den tur famia, den tur loke ta comunidad, na e futuro y bienestar di e mucha cu ta marca e calidad di nos comunidad den e mañan cu nos ta construi.

Ban entrega e mucha na un forma special, amor, aceptacion, e luga cu e merece pa por sigui cana y confronta tur peliger y problema cu ta spera den bida di cada ser humano, e elemento central di un comunidad.

 

 

 

- Advertisement -

DUNA COMENTARIO

Please enter your comment!
Please enter your name here