Home General E tragedia na Boca Mahos 40 aña pasa

E tragedia na Boca Mahos 40 aña pasa

143
0
SHARE
- Advertisement -

Te Diasabra anochi di dia 22 di October 1980 cu e noticia di e catastrofe cu a pasa na Boca Mahos, caminda un parti basta grandi di baranca a basha den lama, ningun hende por a kere cu tabata tin 2 primo cu tabata na mal momento riba e baranca ey, y a costa nan  bida tambe den e tragedia aki.

E dos primonan aki manera custumber a bay pisca na baranca di Boca Mahos sin quizas por a pensa cu tabata nan ultimo biaha.

Awe 40 aña despues, Sra.vda. Jacintha Erasmus-Maduro casa di Sr. Bito Erasmus (42 aña) q.e.p.d kende hunto cu su primo Jorge Erasmus “Horry” (47)  q.e.p.d. , ta conta kico a pasa e dia ey.

 “Tabata Diasabra dia 22 di October pa mas o menos 5’or di marduga, cu Jorge a bati na porta y bisa mi casa si e ta bay compañe pa bay lama. Mi casa a bise prome no e no por, pasobra e tin un trabao pa cuminza Dialuna  y e ta bay prepara tur cos e diasabra ey. El a bin paden y el  a bisami, cu e ta bay complace Jorge tog y ta bay cu ne un rato. E ora el a fluit e  bise e ta bin su tras. Y mi casa a bisami pa bisa e hendenan cu e ta bay traha cu nan cu pa 9’or pa 10’or e lo bay tey nan, no mas laat. Nan a bay y mi ta calcula pa 5.30 ney nan mester a yega na lama ya cu nan a bay na pia.

  Ami a bay traha y ora mi a yega cas pa 6.30 mi 2 yiunan muher chiquito a bisami cu nan tata no a yega. E ora mi a bay na mi cuna y mi a pidi nan pa bay cerca e mama di Jorge, pasobra semper ora e bin di lama e ta bay na su mama prome. Eynan nan a bisa cu nan no sa nada di nan. E ora mi a cuminza bira nervioso, anto mi a pidi un señora cu tabata na mi cuna pa nos bay lama. Mi a bay cu mi 2 yiunan homber.  Ora nos a yega y wak e baricadanan, e señora a puntra mi pakico tin baricada, mi a bise por ta cu e lugar ta peligroso, sin sa cu e baranca a cay.

E hendenan di eybanda a bisa cu nan ta calcula cu entre 8.30 pa 9’or ney awa tabata yobe masha duro, anto nan a tende un zonido hopi duro, pero nan no tabata sa kico a pasa. Ta te ora cu gobierno a bay wak, nan a bisa cu e baranca a cay y cu no tin ningun hende, pasobra nan no tabata sa cu tabata tin hende ta pisca eynan. E ruman muher di Jorge tambe a yega eynan y el a bisa cu ora el a bay traha 8’or na Natural Bridge, cu el a wak su ruman homber ta tira liña y mi casa ta wak den lama. E ora ey mi a pensa cu algo lo a pasa nan. Nos a bay wak den tur e becanan, pero nos no a haya ningun hende, y e ora mi a dicidi di yama polis. Ora nan a bin, nan a luza y a bira scur y a bisa cu nan no por haci nada. E hendenan di Bosch cu tabata eynan a bisa cu nan lo baha pa wak eybao si nan por haya algo, pero nan no a wak nada. E ora nos a dicidi di bin cas, mi famia y bisiñanan rond a compaña mi te mainta, pasobra mi no por a drumi di pensa cu e por bin cas.

  Pero ora cu a bira mainta, mesora nos a bay lama y hopi hende tambe a bay pa wak y yuda busca. Tabata banda 11’or ney polis a bin bisa cu un persona lo a haya un hende na Boca Chiquito banda Alto Vista y si famia por bay pa wak si ta un di e personanan perdi. Anto berdad, e famia nan a bay y tabata Jorge cu nan a haya prome, y despues nan a wak mi casa tambe cu tabata drief. E ora nan a saca nan y hiba nan prome hospitaal. Eynan mi a bay pa wak nan. Jorge su curpa tabata hopi kibra. Mi casa tabata falta 1 wowo y tras di su cabez tabata hopi golpea. Zepp a bisa nos cu mester dera mesora ya cu nan curpa no por bay den freezer y no por bisti nan paña tampoco. Nan a djiez loranan den un deken y mesora nos a bay dera nan den Santana di Paradera”.

Cu tempo, e parti aki a keda un atraccion natural pa bishitantenan, pero tambe mester tene cuenta cu e ta un parti peligroso cu cualquier dia e barancanan por sigui cay den lama.

 

 

- Advertisement -

DUNA COMENTARIO

Please enter your comment!
Please enter your name here