Home Editorial Despues di 40 aña  Covid-19 a confirma e vision di Jossy Mansur

Despues di 40 aña  Covid-19 a confirma e vision di Jossy Mansur

743
0
SHARE
- Advertisement -

Na 2019, ora nos a celebra e 39 aniversario di DIARIO, nos no por pensa cu un pandemia lo a bolbe entrega Aruba e prueba di e necesidad pa e pais tin su propio corant.

Nacemento di DIARIO a cera un epoca durante cual Pueblo di Aruba tabata depende di corantnan cu tabata wordo importa na Aruba, cu tabata un parti chikito di e totalidad di loke Pueblo di Aruba tabata lesa como noticia diariamente.

Na final di decada 70, a bira obvio cu pa e lucha pa Status Aparte di Aruba por a bira logro di e Pueblo, informacion y comunicacion dirigi completamente ariba Aruba tabata esencial.

Den e tempo cu dirigi pa  Betico Croes, e lucha di Aruba tabata culmina, Jossy Mansur a bini dilanti como pionero y dia 3 di November a entrega Aruba su prome diario Arubano.

Menos cu tres aña despues di nacemento di DIARIO, e matutino di Aruba a ricibi e yamada di e lider di e delegacion Arubano, cu Aruba a logra na Conferencia di Mesa Rondo y cu Reino a acorda pa dia 31 di December 1985 Aruba bandona e constelacion Antiano.

Status Aparte no tabata nifica solamente cu lo a baha e bandera Antiano pa subi e bandera di Aruba como pais autonomo den Reino Hulandes. E tabata nifica cu for di e momento, Aruba tabata responsabel pa su mes, pa su propio maneho y su propio felicidad y destino.

E Pueblo di Aruba mester a ricibi tur informacion necesario y comunicacion entre dirigentenan di tur instancia envolvi y Pueblo mester tabata di un grado, cu Arubianonan por a acepta responsabilidad pa nan propio pais.

Existencia di DIARIO a permiti pa for di e prome momento cu problemanan entre e compania internacional Exxon y gobierno di Venezuela a surgi na 1983 y Lago a drenta zona di peliger, pa e Arubiano por tabata prepara pa e futuro autonomo cu un peso extraordinario.

Na momento cu e yamada a drenta na 1984 cu Lago lo a cera, DIARIO a activa su plan di accion pa informacion di Aruba cu den e crisis di Lago mester a acepta su Status Aparte.

E hecho cu Aruba no tabata depende di prensa di exterior y tabata tin su propio matutino, a bira e vehiculo importante pa Aruba a sigui cana den un futuro nobo.

Na entrada di 2019,  DIARIO a mustra Aruba cu futuro lo tabata dificil pa motibo di e necesidad pa recuperacion financiero y economico di e pais.

DIARIO a tuma e pasonan necesario pa por a informa Aruba debidamente riba tur medida di austeridad pero tambe exigencianan di creacion di un economia nobo.

Prome cu Januari 2020 a cera, DIARIO a cuminsa informa Aruba di e peliger di un virus nobo.

Na 2020, despues di 40 aña, DIARIO tabata tin e tarea pa prepara Aruba pa un calamidad, cu a afecta cada pais y cada pueblo na forma diferente.

DIARIO, cu ta completamente dirigi riba e necesidad di Aruba y e Arubiano, a ricibi e tarea pa prepara pa e caida total di su economia y tur loke esaki lo a nifica na entrada di un malesa cu ta menasa bida di cada un ciudadano cu mester wordo proteha.

Internamente DIARIO mester a tuma medida pa percura pa den e crisis nobo, DIARIO sirbi e pueblo di Aruba cu por a conta cu e produccion local di DIARIO, cu ta completamente dirigi riba su responsabilidad enfrente Aruba.

Na 2020, despues di cuarenta aña,  e vision di Jossy Mehsen Mansur a wordo confirma y Aruba tabata tin DIARIO na su disposicion como su fuente di informacion na su idioma, basa riba su necesidad unico y cu e posibilidad y problemanan exclusivo di un pais autonomo.

Celebracion di  40 aña DIARIO, tin un caracter sobrio pero yena cu speransa a base di nos fe den Dios, nos patriotismo y Arubianismo, hunto nos lo crea un futuro nobo pa nos pais.

Nos ta entrega Aruba atrobe e prome editorial di DIARIO, den cual Jossy Mehsen Mansur a splica 40 aña pasa e compromiso cu nos tin cu Aruba.

Nos ta gradici Aruba pa su sosten cu a haci posibel pa e vision di nos fundado, e Arubiano Jossy Mansur, ta na disposicion di nos Aruba.
 

- Advertisement -

DUNA COMENTARIO

Please enter your comment!
Please enter your name here