Home Editorial E dia oficial di nos grandinan merece atencion na 2020

E dia oficial di nos grandinan merece atencion na 2020

89
0
SHARE
- Advertisement -

Awe mundo ta celebra e Dia Oficial di Grandinan. Tur aña, personanan cu alcansa un edad halto ta wordo recorda na un forma special riba nan dia si nan ta den compania di persona, cu ta reconoce e dia aki como un fecha pa celebra algo gran y na mes momento reflexiona riba su contenido.

Na Siglo 20 bira grandi a haya un contenido nobo. Pensioen di behes a wordo introduci pa evita cu un persona cu no por traha mas, ta cay den problema financiero. Casnan di cuido a mira luz. Dokternan specialisa den problemanan di grandinan, a bira uno di e instrumentonan pa hende biba mas aña.

E profiel di nos grandinan a cambia. Nan a keda mas participativo den comunidad na un edad mas halto.

Si antes un persona di 60 aña realmente tabata tin e miho parti di su bida tras di su lomba, awe bida ta cuminsa ora e persona haya oportunidad di ricibi su pensioen y bay ocupa su mes mas cu loke como trahado e no tabata tin tempo pa haci.

Un cantidad importante di grandinan ta sigui den e sector laboral den tempo normal sea como trahado of den nan propio negoshi chikito cu cual nan ta tene nan mes ocupa.

Madushi a haya un importancia nobo y a bira e solucion pa mamanan por participa na trabou mientras Madushi ta percura pa e muchanan merdia.

Ora pone e puntonan aki hunto, por papia di un desaroyo positivo pa grandinan como miembro di un comunidad. E realidad por ta poco of basta diferente.

Na prome luga e cantidad di grandinan ta afecta e base di comunidad y sigur profesionalnan cu tur posibilidad pa sigui traha, mester despedi di nan trabou pa nan baha cu pensioen na forma obliga. Como experto nan por logra haya e oportunidad pa sigui traha y haci uzo di un bon capacidad fisico.

Pa demasiado hende grandi, aumento di edad no ta agradabel pa un motibo cu ta un reto pa un comunidad sano.

Hende ta papia awendia di tur clase di derecho. Hende ta protesta pa nan bienestar pero ta lubida un grupo importante, cu ta grandinan cu den demasiado caso ta wordo forsa pa drenta un final di bida.

Aki mester papia di final di bida ya cu den demasiado caso, bira grandi ta nifica acepta un bida cu cada rato ta bira mas bashi pa loke ta trata e parti mas importante di hende.

Soledad ta bira e marca di edad avansa mientras miembronan mas hoben di famia kier dedica nan tempo na nan mes y na nan hende hoben. Si antes grandinan ta centro di un fiesta di famia, awor hopi bes nan no ta presente.

Edad a subi y e chens pa un hende cuminsa sufri di un mente menos capaz. tambe. Demencia ta uno di e enfermedadnan cu ta afecta hende grandi cu bon salud. Pero nan por sigui biba si nan por conta cu e amor y sentimentonan cu nan merece.

Sentimento ta hustamente e palabra na discusion den mundo moderno, caminda sigur na paisnan Europeo leynan ta wordo introduci pa hende grandi por pone un fin na nan bida, si segun nan bida a perde contenido.

Importante den esaki ta awor, personanan cu ora nan haya yudansa di specialista, ta acepta cu nan kier sigui lucha y asina ta crea e pregunta nobo, si morto por ta e contesta oficial pa soledad.

Na 2020 e coronavirus nobo na un forma particular a cambia bida di e grandi cu tin as chens pa haya e enfermedad y mester tuma medidanan di isolacion. Soledad ta haya un dimension nobo den distancia social cu ta stroba hende brasa otro pero sigur den e isolacion.

Awe ta un dia pa nos tur reflexiona pa asina por duna hende grandi loke realmente e merece y e kier. E capacidad di ta centro di comprension, amor, conocemento di bida cu awe tanto mundo mester.

 

- Advertisement -

DUNA COMENTARIO

Please enter your comment!
Please enter your name here