Home General Wever-Croes a contesta e wega di Knops

Wever-Croes a contesta e wega di Knops

221
0
SHARE
- Advertisement -

Cu posibilidad di un solucion local riba termino cortico

*Awor Aruba ta den posicion pa sigui negocia cu Hulanda

*Evelyn a deshaci di e cabuya Hulandes na garganta di Aruba 

ORANJESTAD (AAN) — Mientras den mundo medico e siman aki, personal medico y di cuido tabata lucha pa scapa bida di Arubianonan cu a wordo contagia cu e coronavirus nobo,  Aruba mester a haya un solucion pa e forma cu e ta sigui dilanti.

Manera DIARIO na hopi ocasion a trece dilanti, Hulanda a spera e momento mas dificil den historia di Aruba for di tempo di e malesa Kabouter, pa pusha Aruba lomba contra muraya.

Gabinete Evelyn Wever-Croes a demostra cu Aruba tin un gobierno cu ta prepara pa actua y a base di ley tuma decision sigur.

Na momento cu e cabuya di e exigencianan Hulandes tabata preta na e garganta di Aruba cu tabata mira placa caba sin cu e por cumpli cu su responsabilidad, Prome Ministro Wever-Croes a presenta e posibilidad concreto pa riba mercado local gobierno haya placa pa soluciona e problema financiero pa e proximo lunanan.

E decision aki ta haci nos recorda e momento na 1983 ora Aruba a haya su Status Aparte di Reino ora Aruba a demostra cu e por logra den su lucha.

Si na 1983 Aruba tabata cana den direccion di un futuro estatal nobo, awe Aruba ta lucha pa reanima su economia, sali for di e problemanan financiero pero na prome luga keda cabes ariba awa den un pandemia cu ta destrui mundo y hende rond mundo.

Bida humano ta na wega na Aruba cu mester a entrega su turismo y a habri e caminda pa Hulanda atende cu un Aruba den situacion financiero dificil loke a fortalece e sentido di poder di Hulanda riba Aruba.

Hamas Reino Hulandes a presenta su mes cu e cara cu awe e gobierno di Mark Rutte, personifica pa Raymond Knops den e negociacionnan actual cu Aruba a mustra Aruba.

Kico Aruba por a haci? Prome Ministro Wever-Croes a duna prueba kico Aruba por a haci den un situacion cu tabata completamente na fabor di Hulanda ya cu Statuut ta prohibi Aruba pa haci un debe den exterior sin autorisacion di Hulanda.

Pues Raymond Knops tabata sa cu e momento e por a presiona Aruba pa bay di acuerdo cu su pakete cu lo tabata contra Aruba.

Ta di lamenta cu na Aruba personanan y medionan cu no ta capacita nan mes y no sa di kico nan ta papia, ta trata na crea e impresion cu loke gobierno di Aruba a haci no ta na interes di Aruba y asina ta sostene Hulanda pa sigui presiona Aruba.

Conocedo di e materia financiero di nos pais, manera nos a proba ora nos a rementa e casonan di Citgo y di Bo Aruba entre otro, nos mester constata cu Prome Ministro Wever-Croes a habri porta pa un solucion temporal pa Aruba cu awor por sigui negocia cu Hulanda.

Nos ta mantene nos punto cu ningun pais ni gobierno na mundo, ta consciente kico ta pasa den e dos lunanan aki di gran incertidumbre mundial pa motibo di e forma cu e coronavirus nobo ta manifesta su mes cu mas forsa rond mundo.

Un cos ta sigur. Aruba lo no hinca rudia e siman aki pa Knops y Aruba tin espacio pa busca solucion den e proximo lunanan sea cu yudansa di Hulanda of cu otro solucion cu un pais bendiciona manera Aruba sigur lo topa riba su caminda.

 

 

 

- Advertisement -

DUNA COMENTARIO

Please enter your comment!
Please enter your name here