Home Editorial Dia di Prensa 2020 den cuadro di un deber historico pa periodismo

Dia di Prensa 2020 den cuadro di un deber historico pa periodismo

108
0
SHARE
- Advertisement -

Casi cuarenta aña pasa, DIARIO a presenta su mes na Aruba, cu di e forma aki a completa e totalidad di exigencia pa un pais por garantisa su base democratico.

Na momento cu e lucha pa un Aruba autonomo den Reino pa medio di Status Aparte mester a culmina, DIARIO a bira e forma pa guia y prepara Aruba pa e futuro nobo como pais den Reino.

Mientras 2019 tabata yega su final, nos a cuminsa papia di e forma cu nos lo a recorda nos di 40 aniversario, den cual e lucha di un pais pa por sali dilanti mester a duna animo den un tempo di crisis financiero y economico.

Nos no a haya oportunidad pa sigui desaroya un plan pasobra na momento cu 2020 a bati na porta, uno di e encargonan mas pisa den nos historia a wordo entrega.

Covid-19, e coronavirus nobo, a exigi di nos pa amplia nos tareanan y cuminsa prepara Aruba pa loke hamas nos por a pensa cu lo por pasa cu Aruba.

No tabata prijs di petroleo cu lo por a afecta nos turismo. No tabata ningun problema cu hende por domina y coregi cu a bati na porta di Aruba, cu DIARIO mester a prepara y guia pa un realidad cu hamas nos por a visualisa.

Na 2020 nos a ricibi e reto, pa duna nos tarea periodistico un dimension mucho mas pisa y sali directamente na defensa di e bida di hende cu un virus invisibel y incontrolabel, a pone na peliger.

Como periodista nos mester a bay haci investigacionnan den e lama di economia cu ta wordo contamina cu un virus, cu na forma feroz a cuminsa destrui e hende productor di economia, centro di comunidad y motibo di nos existencia.

2020 a exigi di nos, pa amplia nos teritorio di trabou pa asina por sirbi Aruba riba tereno periodistico.

Awe, Dia di Prensa, nos ta presenta nos mes na Pueblo di Aruba, cu ta biba un di su epocanan mas doloroso. Nos consuelo na nos Pueblo ta, nos trabou, nos esfuersonan pa por a sirbi Aruba na momentonan cu nos mes como hende tabata teme pa nos mes tambe.

2020 a bira e aña cu a marca nivel di periodismo na Aruba y sigur na DIARIO. Nos mester a continua cu e trabou di tur dia como e matutino cu ta presenta Aruba tur informacion riba su desaroyo na e idioma Papiamento di Aruba pero tambe na un forma comprendibel pa uno y tur.

Ademas di esaki, nos mester a bay investiga e mundo di e coronavirus nobo pa prepara Aruba pa tur loke mester a prepara e pais. E caida di produccion mundial, e crisis economico y financiero cu ta spera mundo, e necesidadnan riba tereno medico y caida di nos turismo hunto cu caida di economia mundial.

Na 2020 DIARIO a bira e matutino cu cual Aruba por a conta tur dia pa informa su mes, prepara su mes, den caida di e loke tabata considera bida normal y entrada di un situacion di guera contra un enfermedad mortal.

E no tabata un tarea facil. DIARIO ta parti di Aruba y nos tur mester a haci cambionan pa por a duna continuacion na un trabou sagrado.

Awe ta Prome di September. Dia di Prensa. Forsa y animo nos ta desea nos Aruba. Na mes momento nos ta confirma nos compromiso pa sigui informa nos pueblo, prepara nos pueblo, guia nos pueblo den turbulencia mundial cu lo mester habri paso pa un futuro nobo cu ta warda nos!

Tabata un placer y honor pa como expresion di democracia, sirbi pueblo di Aruba na momentonan historico di e pais.

- Advertisement -

DUNA COMENTARIO

Please enter your comment!
Please enter your name here