Home Salud Aworaki tin rond di 300 cluster di Covid-19 den cas di famia...

Aworaki tin rond di 300 cluster di Covid-19 den cas di famia na Aruba

689
0
SHARE
- Advertisement -

Dra. Mariza Ordoñez di DVG:

ORANJESTAD (AAN):  Dra. Mariza Ordoñez di Departamento di Salud a confirma cu tin hopi cas na Aruba unda tin basta caso di Covid-19.

El a referi cu tin casnan unda ta biba basta hende y esaki ta haci cu tin te hasta 9 persona contagia cu Covid-19 na e momentonan aki.

Asina el a duna di conoce den un entrevista cu Aldrich Croes den e programa Entrevista di Dia di e radioemisora Hits 100 FM.

E medico a indica tambe cu e esaki ta nifica cu e casnan aki a bira un cluster. Na e momentonan aki  tin rond di 300 cluster na Aruba. Tur esaki ta e resultado di e brote di Covid-19 cerca e grupo di hobennan cu a bay haci fiesta den club nocturno y cu a contagia.

Nunca e hobennan aki a pensa cu nan a bay piki Covid-19 pa hibe pa nan tata, nan mama, ruman, wela, welo y hasta pa nan yiunan. Aworaki e clusternan aki ta e consecuencia di nan comportacion.

Nan a cura caba, pero nan a laga lo peor pa nan famia. Aworaki pesey ta hayando famianan di minimo 4 hende y te hasta cu 9 hende malo cu Covid-19 den un cas, Dra. Ordoñez a duna di conoce.

El a entrevista un famia cu 8 miembro di e famia contagia y eynan a ripara e desesperacion, e desconsuelo, desanimo. Nan no sa kico nan tin cu haci.

Ora cu e personanan aki ta haya un yamada di DVG, nan ta cuminsa sinti e sosten y cu nan lo por haya e encurashamento y e contesta pa e preguntanan cu nan por tin. Toch e ta dificil pasobra tur hende mester keda paden den cuarentena of den isolacion.

DVG ta encurasha nan pa bira creativo con nan ta bay distribui den e cas pa contene e virus den nan mesun cas.  Na mesun momento, nan tin cu percura pa e cuido di nan mes.

No tur hende lo por bay hospital y no tur hende lo haya un docter banda di nan pa por yuda nan, a bisa.

Di e forma ey mester keda realistico, cu e pensamento y cu e informacion cu cada un di nan ta hayando pa por zorg pa nan famia. Dra. Mariza Ordoñez a splica.

- Advertisement -

DUNA COMENTARIO

Please enter your comment!
Please enter your name here