Home General Tin hopi interes den plantacion  y por premira hopi mas cunucu pa...

Tin hopi interes den plantacion  y por premira hopi mas cunucu pa otro aña

46
0
SHARE
- Advertisement -

Directora di Santa Rosa

ORANJESTAD (AAN): Actualmente tin basta interes den comunidad pa loke ta plantacion. Directora di Santa Rosa, Nathaly Maduro a confirma e interes aki y a bisa cu nan mes ta pone hopi informacion relaciona cu e sistemanan cu tin pa colecta awa, por ehempel.

Den un dia di yobida, a señala, un tanki di 10 ton a yena full y esey ta mustra cu si na cas por instala un sistema, cu cualkier awa di yobida bo por colecta esaki y esey lo yuda bo despues.

No ta solamente pa esnan cu ta planta, pero kier haci un apelacion tambe na negoshinan y na esnan cu aworaki ta bay cuminsa cu plantacion na nan cas. Tambe tin oficinanan unda tin posibilidad pa haci recoleccion di awa.

Kisas e lo nifica un inversion aworaki pero den futuro e lo por yuda. Awendia por wak hopi hende cu rond di nan negoshi nan ta plantando matanan cu por produci fruto.

Tin muchanan cu nan mayornan ta sin trabao y nan ta sinti falta di un alimentacion sano. Semper por aporta y hacie un proyecto pa comunidad. Pero importante ta pa haci’e awo.

Na Juli, tur aña awa ta yobe. Pero ta yega un tempo cu awa ta stop di yobe. Entre aworaki cu December, tin e chens pa prepara y asina pa otro aña por premira cu ta bay hopi mas cunucu y hopi mas proyecto di plantacion. Kisas como compania, bo por aporta cu awa pa un proyecto asina, Maduro a remarca.

Santa Rosa a haya yamadanan di personanan cu a planta pa prome biaha durante COVID. Aworaki por ta tin matanan cu a cuminsa haya malesa of cu a cuminsa bira grandi y no ta sigur kico pa haci.

El a bisa cu por yama Santa Rosa libremente. Tin funcionarionan cu por bay haci control na cas of na nan cunucu. Ta importante pa no ‘give up’, si a yega asina leu.

Hopi hende no a realisa cu nan por planta y cu nan mes por produci. No perde e animo ni e gana. “Ta algo cu ta bay aporta no solamente na bo salud (…), pero tambe na e parti financiero. Tin hopi producto cu nos mes por produci y cu kisas pa falta di tempo, kisas pa falta di informacion hopi biaha nos ta prefera di pasa un supermercado y inverti den algo cu ta bin di afo. Pero bo tin cu wak tambe e parti economico”, a splica.

      

- Advertisement -

DUNA COMENTARIO

Please enter your comment!
Please enter your name here