Home Labor “Ta aconseha doño di trabao y trahadornan coexisti hunto pa supera e...

“Ta aconseha doño di trabao y trahadornan coexisti hunto pa supera e crisis aki”

25
0
SHARE
- Advertisement -

Mediador Pontilius:

ORANJESTAD (AAN) – Siguiendo cu e entrevista cu señor Anselmo Pontilius, Mediador di Gobierno, el a amplia tocante e violacion di ley laboral, cu ta tumando lugar den e temporada di crisis aki.

“Na momento cu e entrevista aki ta tuma lugar, mi tin sigur cu tin dunadornan di trabao cu a viola ley, sea conciente of inconcientemente, y cu nan ta na tempo pa coregi e eror cu nan a haci. Un eror den cual e trahador a haya menos pago. Esey no por! Y e trahador ey tin derechonan y e dunador di trabao ey mester tene cuenta cu si un trahador asina ey ta wordo impone, e por bay Corte y mi ta sigur cu laat of tempran, Huez ta duna ordo na e compania pa paga”, sr. Pontilius ta acentua.

Sr. Pontilius a toca tambe e otro banda di medaya. “Ta berdad cu un cantidad di compania, den un momento di crisis, ta haya su mes cu falta di likidez enorme. Nos conseho ta pa e dunador di trabao y e trahador trata di coexisti hunto pa supera e crisis”, el a comenta.

Un dunador di trabao cu ta haye den conflicto of problemanan serio di likidez, por ta a tuma decisionnan cu ta incorecto y ilegal. Pero cu na dado momento e por coregi, reconociendo cu el a faya y cu e tin un debe cu e trahador y cu den tanto tempo e lo pague, refiriendo na e casonan unda e dunador di trabao ta paga menos ora cu loke e trahador ta cumpli cune.

 Mediador Pontilius tambe a scucha denuncia, por ehemplo di e Director di SVb, señalando cu tin dunadornan di trabao cu no tin nan trahadornan debidamente registra y tur esakinan ta problemanan conoci.

“E crisis aki tin cu duna nos e oportunidad awo di percura pa esakinan no continua. Tin dunador di trabao cu a kita, por ehemplo, prima di pension, AOV, AZV y no a paga na instancianan. Esaki ta realidadnan cu nos tin, y nos tin cu wak nan”, sr. Pontilius a señala.

El a reitera pa trahadornan concerni pa no keda sin acudi na Departamento di Labor, of si nan tin un abogado amigo cu por traha un carta pa nan doño di trabao, bisando e cu di tal pa tal fecha nan no a wordo paga, ya cu impone “no work no pay” na e trahador, ta ilegal.

- Advertisement -

DUNA COMENTARIO

Please enter your comment!
Please enter your name here