Home General Responsabilidad mester ta guia pa trata un “Act of God”

Responsabilidad mester ta guia pa trata un “Act of God”

143
0
SHARE
- Advertisement -

Awe tur miembro di Parlamento mester bolbe na nan huramento

*Politica no mester ta herment partidario pero curason di Aruba

*Destino a dicidi pa un momento historico pa e pueblo Arubano 

ORANJESTAD(AAN)–Ningun pero ningun Arubiano, ningun persona cu no ta Arubiano y ta parti directo of indirecto di Aruba, por a desea pa awe e representacion di pueblo di Aruba mester uni pa trata e tema doloroso cu e mester trata.

Awe no ta e futuro estatal, e futuro financiero, e futuro economico y sigur no resultado di eleccion 2021, cu mester dicidi riba e contenido di e reunion di Parlamento di Aruba.

Riba agenda di e reunion di Parlamento pa awe ta aparece un topico cu ta forma e motibo pa cual tin un Parlamento y pa cual e sistema politico conoci como democracia, a wordo institui.

Pa analisa loke awe lo wordo discuti den Parlamento, mester bolbe na e huramento di Parlamento den cual e bienestar di cada ciudadano na Aruba ta central y den cual e miembro di Parlamento solamente ta tene e interes di Aruba na bista pa e tuma un decision.

E consenshi di cada miembro di Parlamento mester papia awe na momento cu Aruba, representa dor di eleccion den Parlamento, cumpli cu e mandato mas importante cu el a ricibi di pueblo, cu ta sigura bienestar di e pais y di e ciudadano.

Pa cumpli cu su huramento, cada miembro di Parlamento di Aruba mester comprende e dolor inmenso di Aruba, di tur Arubiano cu ta core riesgonan personal directo pa motibo di un malesa cu ningun hende a inventa.

Den mundo legal tin un termino sumamente importante pa splica e base di e reunion aki.

Den mundo legal ta papia di un “Act of God”  ora ta atende situacionnan cu no ta basa riba loke hende tin den su man, pero riba loke hende no tin den su man.

Ora den un documento wordo papia di un “Act of God”, ta sali for di e punto di bista cu ningun hende por asumi e luga di Dios, Kende den e situacionnan manera e realidad actual di Aruba, ta wordo teni como e creador di e situacion.

Loke awe ta pasa na Aruba ta un calamidad, manera DIARIO a trece dilanti a base di su investigacionnan den tur sector na Aruba y den tur gremio.

Empresarionan y trahadonan ta uno na personanan cu no ta capaz pa dicidi pa nan mes manera mucha y hende grandi. Un solo dolor Aruba conoce cu ta e ansha enfrente un enfermedad cu a destrui economia di Aruba, a deshaci di entrada pa e pais y su ciudadanonan y a crea un situacion social cu por resulta den hamber y miseria total pa no papia di morto.

Awe Aruba ta dicidi kico mester haci cu e ayudo cu Reino Hulandes a priminti bou condicion, cu si nos ta honesto cu nos mes, desaroyonan na e pais a causa.

Na e momento aki nos ta busca union y no ponencianan cu por yuda deshaci di nos posicion cu awe Aruba mester di un union total pa enfrenta Hulanda y mester mira e realidad di un”Act of God” den cual e virus ta bira mescos cu un horcan of temblor cu a destrui bienestar di Aruba.

E situacion cu awor Aruba mester enfrenta, mester haci nos humilde. Mester haci nos uni y mester deshaci di tur loke ta pone nos yama danki cu nos tin un caminda pa bay pidi asistencia y no cay bou di e paisnan rond mundo cu ta depende di asistencia internacional cu mester paga na forma bruto mañan.

Aruba no ta den un problema exclusivo pero ta parti di un mundo cu ta confronta un malesa como peliger.

Awe cu fe den Dios, Aruba mester atende e situacion cu a surgi den Parlamento. Un “Act of God” cu ta e terminologia cu hende ta uza den condicionnan legal cu ta admiti cu poder di hende tin limite.

Algo cu sigur por sirbi como inspiracion pa nos mundo politico!

- Advertisement -

DUNA COMENTARIO

Please enter your comment!
Please enter your name here