Home General Relacion cu un partido no por continua si acaso no tin confianza...

Relacion cu un partido no por continua si acaso no tin confianza y comunicacion

216
0
SHARE
- Advertisement -

ORANJESTAD (AAN): Diabierna mainta a tuma lugar den Parlamento di Aruba, e reunion publico pa discuti un mocion di desconfianza contra Ministro Marisol Lopez-Tromp.

   Un di esnan cu a hiba discurso na comienzo tabata lider di fraccion di POR, esta Dellanire Maduro.  El a pone un papel su dilanti y a cuminza lesa for di dje.

   Maduro a bisa cu desde 27 di Januari 2020 el a cuminza traha como Parlamentario y como lider di fraccion.  E ta un hoben cu a drenta arena politico pa contribui pa hiba e pais dilanti.  El a bisa cu el a enfrenta diferente reto, e.o. e pandemia di Covid-19, e crisis na Venezuela, y e situacion actual pa cu discusionnan cu Hulanda.

   Asina el a cuminza lesa di papel, bisando ningun hende a premira e impacto financiero cu e pandemia ta trece. Na e momentonan dificil cu Aruba ta pasando aden debi na Covid-19, un gobernacion stabil cu por traha ta di suma importancia pa asina atende cu e prioridadnan cu e crisis aki ta exigi.  Aki ta unda cu mester reconoce e maximo esfuerzo cu Gobierno (Prome Ministro) a bin ta eherce na e mihor forma posible na bienestar di e pais.

   Maner ata conoci, Parlamento ta e Hefe di Ministronan y nan por retira un Ministro cu un mocion di desconfianza.

   Den partido politico bo por tin diferencia di opinion, y ta normal pa tin diferencia di opinion, y esaki ta algo sano y algo normal cu ta socede.  Pero na final di dia mester por yega na otro pa por sigui traha den equipo na bienestar di e pais.  Pa por logra esaki ta importante pa tin cierto cualidadnan cu mester ta presente.

   Aki ta papia di confianza, comunicacion, sinceridad, y respet.  E palabra ‘confianza’ a wordo mira hopi ultimo tempo, y den un Partido Politico e ta extremadamente importante.  Mescos cu un relacion di famia, pasobra sin confianza y comunicacion y sinceridad y respet, e relacion no por continua na forma sano, of a yega na su final.

   Parlamentario Maduro a papia di e Timeline cu Partido POR a participa na 22 September 2017 den eleccion, y a logra saca 2 asiento.  Cu esaki a wordo logra danki na tur voto colectivo pa candidatonan riba lista di POR.  Esaki a duna oportunidad na e partido pa nombra 2 candidato pa Ministro, y na October 2017 a yega na acuerdo pa coalicion.

   Algun luna pasa, esta 5 di Juni 2020, via un carta a sali na cla cu Partido POR no por a comunica cu Ministro Marisol Lopez-Tromp.  Varios reunion a wordo yama, y hendenan ta atende cu excepcion di Ministro Marisol Lopez-Tromp mes.  Hasta reunion di Partido relaciona cu e Ministro mes, e persona no a asisti.  Apart di esaki, ningun momento tabatin iniciativa di e Ministro pa yama reunion.

   Ultimo reunion cu a haci peticion pa su presencia, e Ministro no a ni sikiera yama pa bisa cu e no ta asisti.  Segun Maduro, nan a keda 1 ora y mey warda y despues a haya potret di unda cu e ta, sin splicacion di su ausencia, y ni purba na reschedule e reunion.

   Atrobe a yega na un momento unda por mira cu e interes di e Ministro pa atende esaki no tabatin, y tras di otro esey tabata pasa?

   Esaki a pone cu Partido POR a informa prensa y a manda un carta pa Ministro pa bisa cu no tin confianza mas den dje, pero Lopez-Tromp a informa cu e lo no retira.

   Conciente di e crisis cu Aruba ta pasando aden, Partido POR a cuminza cu un forma interno pa intermedia via di un tercer persona.  Dellanire a splica cu e tambe a haci intento pa comunica cu e Ministro, pero no a logra.

   Ora bo haya un desacuerdo, bo mester yega na otro pa mira con ta soluciona esaki.  Si ta un banda so ta bashando awa den biña, e ora ta bira dificil pa drecha e relacion aki.

   Segun e lider di fraccion di POR, den Parlamento nan ta haya informacion di expertonan tambe riba e situacionnan aki.  Nan a haya tende di e.o. Parke Nacional Aruba, cu e Asociacion di vehiculo UTV, tambe cu Fundacion Pa Nos Comunidad, y tambe via Comision di Labor a papia cu e gremio di parti di Pesca, pa haya nan punto di bista tambe.

   Pero no lubida cu situacion di Covid-19 a pone hopi hende perde trabao, cu entrada menos mensual.  Fundacion FPNC a anuncia cu cada siman nan ta hayando mas y mas hende, un promedio di 125 famia pa siman, cu ta cuminza depende riba donacion di cuminda.

   Maduro a bisa cu den Parlamento tambe tin hopi miembro cu ta para pa defensa di Medio Ambiente, pues no ta responsabilidad so di e Ministro.  “Nos tin di tene cuenta cu esey, pero tambe tene cuenta cu e persona,” el a bisa.  El a mustra cu Parke Nacional Aruba kier stop UTV pero si ta permiti Jeeps pa sigui pa pasa eyden.

   Encuanto Spearfishing, a compronde cu ta un topico di hopi aña y e gremio di pesca a bisa cu ora cu a pasa e ley aki, tin di tene cuenta cu tratado internacional, pero nunca a tene cuenta cu e gremio.  Nunca a check cu nan.  Siendo cu e gremio ta di acuerdo pa prohibi cierto area, of cierto temporada so ta permiti piscamento na algun lugar.

   Di con a bin dilanti atrobe?  Pasobra net durante Covid-19 tin di haci algo pa yuda e piscadornan aki pone cuminda riba mesa.

 

- Advertisement -

DUNA COMENTARIO

Please enter your comment!
Please enter your name here