Home Gobierno No tin deadline di negociacionnan cu Hulanda

No tin deadline di negociacionnan cu Hulanda

83
0
SHARE
- Advertisement -

Prome Minister Evelyn Wever-Croes

ORANJESTAD (AAN): Prome Minister Evelyn Wever-Croes a enfatiza cu no tin un deadline di negociacionnan cu Hulanda. E unico deadline cu tin ta e rosea financiero di Aruba.

   “Nos no tin un rosea financiero ilimita. Ta yega un momento cu mester tuma un decision pa e mihor interes di Pais Aruba,” segun Prome Minister. 

   Gobierno a dicidi di manda Parlamento un memorandum na unda nan a pone explicitamente cada paso di e negociacion. E mandatario a bisa cu tin cierto punto di beneficio, como tambe puntonan mester wordo atendi den e negociacionnan.

   E problema di mas grandi, Prome Minister a indica, ta e autoridad extenso cu e entidad cu Hulanda kier implementa ta bay tin. Nan a papia hopi cu Hulanda riba e tema aki, pasobra Gobierno no ta di acuerdo pa acepta un entidad cu ta bay tuma lugar cu ta bay sinta riba un stoel ni di Gobierno ni di Parlamento.

   Nan a pidi pa Hulanda bay Raad van Staten pa discuti e tema aki, pa adelanta prome cu e ley mester cana su caminda. Esaki a wordo rechaza.

   Pa Gobierno di Aruba, autonomia di nos Pais ta sumamente importante y nan kier pa futuro generacionnan tambe por goza y lucha p’e.

   Covid a kibra economia di Aruba y sin ayudo, no ta bay logra sali afo di e situacion aki. Prome Minister ta sigur cu esaki ta temporal y cu Aruba lo sali di esaki relativamente lihe.  Loke tin riba mesa actualmente nan no por acepta y pesey nan lo sigui negocia cu Hulanda.

   Prome Minister a haci un peticion na Parlamentarionan. Dos pregunta nan a lanza na Parlamentarionan. Un ta kico ta e opinion di cada Parlamentario of cada fraccion, incluyendo e Parlamentario independiente riba unda Aruba ta para den e negociacion. Ta importante pa tende opinion di cada fraccion riba e situacion aki. E opinion ta cu Gobierno mester acepta e proposicion di Hulanda, of si esaki ta inaceptable.  E di dos ta si e opinion no ta aceptable, pa duna otro alternativa. Pasobra pa Aruba wordo bon dirigi, mester bin cu alternativa. Y no solamente kico por y kico no por.

   Prome Minister no kier duna ni un leve impresion cu si nan acepta e pakete di Hulanda, e problemanan ta termina. Esaki lo trece simplemente un trankilidad financiero. Pero si e lo trece otro set di problema.   

         

- Advertisement -

DUNA COMENTARIO

Please enter your comment!
Please enter your name here