Home Gobierno “Mi ta conta cu e responsabilidad civico di cada ciudadano di nos...

“Mi ta conta cu e responsabilidad civico di cada ciudadano di nos pais”

113
0
SHARE
- Advertisement -

Minister Presidente:

ORANJESTAD (AAN) – Prome Minister Evelyn Wever-Croes, a haci un yamada na henter comunidad pa asumi un actitud civico, warda tur e reglanan di protocol di coronavirus crisis, mustra responsabilidad y disciplina, pa evita mas contagio di e virus.

“Na e momentonan aki, ta importante pa nos demostra trankilidad cu cabes frio. Enberdad un grupo di nos comunidad no a atene na disciplina, no atene nan mes na disciplina, pero esey no kiermen cu tur cos ta perdi. Nos ta prepara, y bon prepara pa e situacion aki, y nos ta bayendo ainda hasta miho cu nos a prepara.

“Pero ta hopi importante pa aworaki nos tur ta cabes frio, pa nos tur ta hopi mas alerta, y hopi mas disciplina.

“Kico esey kiermen? Cu di awe en adelante cuida bo mes, cuida bo famia. E reglanan ta keda na vigor; laba man mas frecuente cu ta posible cu habon, hunta hand sanitizer, tene distancia di otro, no touch otro, no duna man, no braza, no sunchi, no papia cerca di otro, uza mondkapje caminda no por mantene e distancia for di otro, y si bo tin sintoma por fabor haci loke mi a caba di bisa”, e dignatario a reitera.

“Laga nos ta disciplina awo si! Y laga nos keda cu cabes frio pa nos atende e retonan nos dilanti. E retonan ta grandi pero no ta mas grandi cu loke nos a pasa aden caba. Aruba a yega di pasa den hopi cos grandi; e prome parti di e crisis di coronavirus tabata hopi mas serio cu locual nos ta bibando awo. Pero pa evita pa e bira mas serio awe, nos tin cu tuma accion awe, y mi ta conta cu e responsabilidad civico di cada ciudadano di nos pais, pa nos por logra esaki. Nos ta un pais hopi orguyoso di tur nos logronan. Nos a demostra mundo henter cu nos sa con pa bringa e covid-19 crisis aki tambe” Prome Minister a conclui.

- Advertisement -

DUNA COMENTARIO

Please enter your comment!
Please enter your name here