Home General Hospitalnan a cuminza cera porta dilanti cara di pashentnan cu Covid-19 debi...

Hospitalnan a cuminza cera porta dilanti cara di pashentnan cu Covid-19 debi na scarcedad di cama

446
0
SHARE
- Advertisement -

Dominicanonan realizando cu esaki no ta ‘fake news’

ORANJESTAD (AAN): Manera DIARIO a raporta caba recientemente, hecho ta cu Hospitalnan na Republica Dominicana ta yenando na capacidad maximo!  Tanto camanan normal riba piso, y tambe camanan den Intensive Care Unit ta full ocupa.

   Y awor Hospitalnan a djis cuminza manda pashentnan serio cu Covid-19 bek pa nan cas, como cu no tin cama pa asina hospitaliza nan.

   Pa colmo, siman pasa e conocido docter internista Luis José Castillo a muri na Republica Dominicana.  E tabata e Presidente di e Consejo de Directores del Centro Medico Materno Infantil di Santiago, y tambe coordinador di e residencia medico pa internistanan di Hospital Regional José Maria Cabral y Báez di e ciudad ey.   E tambe a fayece di Covid-19.

   Un comerciante di 73 aña di edad, Jesús Sanchez a muri Diabierna anochi na un conocido clinica na Santiago tambe debi na Covid-19.  Na prome instante e no por a haya un cama den Hospital, ora cu el a cuminza bira hopi malo.  Pero ora cu porfin el a haya un cama y a drenta, pero Docternan a bise cu ya e ta laat.  Algun ora despues el a fayece.  Su mesun yiu pa colmo tambe ta hospitaliza.

   E comerciante aki ta un persona cu tabata maneha negoshi di su ruman cu ta bende comestible y demas producto basico na Santiago.  Semper e tabata bisa cu e no sa bebe alcohol, e no tabata huma, no tabata gusta bebe coffie, y tampoco tabata hunga.  Pasobra su bida tabata come, traha, y dedica su mes na su famia, y nada mas.

   HOPI KEHO:

   Pashentnan cu Coronavirus nobo a cuminza keha cu e clinica- y hospitalnan na Santiago no kier atende nan mas, y ta blo tira culpa cu no tin cama ni espacio, y asina pashentnan ta haya nan obliga di bay cas bek pa asina trata nan mes cu remedi di cas, y esaki claro ta implica un peligro pa nan bida.

   Varios gobernante ta mirando e situacion aki con e ta empeora dilanti nan mesun wowonan, awor cu e brote di Coronavirus ta bayendo sky-high na Republica Dominicana.  Despues di e campaña electoral unda hendenan a aglomera den otro sin fin, awor ta sinti e efecto y resultado.

   Tin algun Hospital cu si ta manda pashentnan bek pa nan cas, pero nan ta haya receta di remedi pa trata na cuida nan mes na cas, pero tin di percura pa keda den isolacion.

   Y ni maske cu autoridad di Salubridad Publico y Polis a tuma medida, toch tin hende cu no ta preocupa cu e reglanan di distanciamento social ni reglanan sanitario, y ta sigui subi caya y topa otro, y asina e brote ta sigui.

   Tur clinica y hospital awor ta satura cu pashent di Covid-19.  Hasta e poco Dominicanonan cu na comienzo tabata grita cu boca grandi cu e asunto di Coronavirus aki ta ‘fake’, awor a bin realiza cu tur esaki ta berdad 100%, y cu docter- y enfermeronan ta trahando oranan largo cu poco chens di break, pa asina atende pashentnan.

   Docternan a declara na prensa, cu cada dia nan ta mira pashentnan nobo ta yega na porta y bati pidi yudanza, pero no tin cama ni espacio mas den pasiyo ni riba e pisonan mas.  Pues nan tin di bay bek nan cas.

  Te cu Dialuna anochi, Republica Dominicana tin awor 34.261 caso activo, y un total di 1.328 persona a fayece.  E total di hendenan cu a haya e virus na e pais di Merengue ta 80.499 persona.

- Advertisement -

DUNA COMENTARIO

Please enter your comment!
Please enter your name here