Home General Extracto di declaracion di algun Parlamentario tocante discusion publico den Staten

Extracto di declaracion di algun Parlamentario tocante discusion publico den Staten

269
0
SHARE
- Advertisement -

Den cuadro di mocion di retiro di Minister Lopez-Tromp

ORANJESTAD (AAN) — Manera ta conoci, Diabierna ultimo a tuma lugar e reunion publico di Parlamento, unda a wordo trata e peticion di Partido POR, pa retira drs. Marisol Lopez-Tromp como Minister di Infrastructura y Medio Ambiente. Esaki ta un extracto di locual algun Parlamentario a comenta pa DIARIO.

ROCCO TJON: E lider di fraccion di MEP sr. Rocco Tjon a menciona cu e ta contento cu Minister Lopez-Tromp tey, y nan kier scucha contesta di e diferente preguntanan cu nan a haci na e mandatario, y si e por wak posible solucionnan pa e puntonan cu fraccion di POR a trece dilanti den nan carta, pa e impasse cu tin e dignatario y su parlamentarionan.

Tjon a remarca cu durante e crisis e aspecto di mas importante ta bin cu aclaracion y transparencia, pa e pueblo tin trankilidad. El a haci enfasis cu Aruba ta den un crisis financiero-economico dificil, y gobierno tin cu mitiga tur e impacto di Covid-19 y e ta meymey tambe di e negociacionnan cu Hulanda. 

RICARDO CROES: e lider di partido RED, a expresa cu mester scucha e minister den ken a pone desconfianza, pa wak di con nan a pone tanto desconfianza den asina corto tempo. El a referi na e mocion cu e mesun partido cu a institui e minister, ta presentando na Staten pidiendo su retiro. Pesey el a cuestiona e forma di procede di, entre otro, di e partido POR. El a bisa cu ningun hende tin cu dune cuenta di loke ta pasa den nan partido, pero el a dicidi di atende cu e procede di e Comision institui a base di e acuerdo di gobernacion. 

DAPHNE LEJUEZ: Parlamentario Independiente sra. Daphne Lejuez a comenta cu ora tin un mocion di desconfianza pa cual ta pidi sosten di Parlamento, esey kiermen cu e minister en cuestion mester a actua iresponsable contra Parlamento, pero lamentablemente esnan cu a presenta e mocion, te na momento di e declaracion aki, no duna ningun prueba di con esaki a tuma lugar. Locual el a scucha un parlamentario papia den nomber di gobierno y e no ta compronde den ki capacidad e ta haci esaki. El a splica cu esaki no ta un mocion di desconfianza di Parlamento si no di un partido, y si tabata di Parlamento lo tabata tin diferente herment con pa trata e situacion prome cu yega na unda nan ta aworaki. 

ARTHUR DOWERS: E parlamentario Arthur Dowers di fraccion di POR a declara cu e por a compronde cu e fraccion di MEP ta bao amenaza, cu si nan no vota na fabor di e mocion di POR, Gobierno ta cay. E ta haya cu esaki ta un ponencia sumamente fofo, pasobra den su opinion, ningun hende por exigi di un parlamentario pa e vota pa algo cu ta bay contra di su consenshi y su principio. Segun Dowers, parce cu e gabinete aki ta basa riba hende sin principio y sin consenshi. El a cuestiona cu un parlamentario di MEP a bisa durante e prome tanda di e sesion, cu e no ta confia den ningun minister di e gabinete aki, cu excepcion di Minister Presidente, y si esey ta e caso e ta kere cu e gabinete aki, sinceramente mester bay cas. 

DELLANIRE MADURO: Parlamentario di fraccion di POR, a reitera cu e partido a busca na hopi manera pa yega na otro (cu e mandatario), pa bienestar di e pais, tumando na cuenta e crisis di Covid-19 cu nos ta pasando den dje, unda ta importante pa e prioridadnan prevalece aworaki. El a bisa cu un bez cu un persona ta perde confianza di su partido, ta bira dificil pa e sigui y esey e partido ta spera, cu e minister lo a honra su mes y retira. Pero, manera ta conoci, esey no ta e caso, e dama a expresa.

- Advertisement -

DUNA COMENTARIO

Please enter your comment!
Please enter your name here