Home Hudicial Cuater tripulante abordo di tugboat haya cu 2253 kilo di cocaina declara...

Cuater tripulante abordo di tugboat haya cu 2253 kilo di cocaina declara liber

158
0
SHARE
- Advertisement -

Mientras cu Fiscal a exigi 12 aña di prison pa cada un

E capitan a wordo haya responsabel y condena na 10 aña di prison

ORANJESTAD (AAN) – Ayera mainta den sala di Corte di Husticia di Aruba, a tuma lugar e sentencia den e caso penal cu Ministerio Publico a cuminsa contra un grupo di 5 homber Latino, kendenan a wordo deteni abordo di e tugboat “Garcia” caminda a haya 2253 kilo di cocaina scondi den un bodega.

   E sentencia di Hues tabata un baho di awa frieu pa Fiscal, ora cu Hues a declara cuater di e sospechosonan liber y a condena solamente e capitan na 10 aña di prison.

 

CUATER SOSPECHOSO DECLARA LIBER

E hombernan, Y.C.M.(ayudante makinista), C.C.H.(koki), J.C.R.(stuur), H.H.C. (capitan) y H.R.L.( makinista), a presenta dilanti Hues pa scucha nan sentencia. Tur ta wordo acusa di importacion di lote grandi di cocaina riba 14 October 2019 riba e Tugboat “Garcia” caminda a haya 2253 kilo di cocaina.

   Hues a bisa cu e ta haya legalmente proba cu a importa un lote grandi di cocaina. E droga tabata destina pa Trinidad & Tobago. Hues a mustra cu Fiscal a indica cu lo tabatin botonan go fast cu lo a hiba e droga abordo di Garcia ora e tabata navegando den awanan territorial di Aruba.

   Hues a bisa cu no por prueba cu ta go fast a hiba droga riba tugboat. No tin nada di esey riba radar. Cu e boto a wordo controla na Cartagena, Colombia y no tabatin droga pa autoridadnan di Colombia, no tin prueba di esaki.

   Na opinion di Hues, no por exclui cu e droga tabata den e bodega 2 ora e boto a sali for di Colombia. El a mustra cu tur e sospechosonan ta bisa cu nan no tabata sa di e droga. Hues ta haya cu no tin indicacion cu e cuater tripulantenan, Y.C.M., C.C.H., J.C.R. y H.R.L. tabata sa cu e droga tabata abordo. Na opinion di Hues, e tripulantenan tabata riba tugboat pero no tin indicacion cu nan mester tabata sa cu e droga tabata abordo. Hues ta haya cu no tin prueba cu nan tabata sa di e droga.

   Hues a declara tur cuater tripulante liber y a duna orden pa pone nan den libertad.

 

CAPITAN DI BOTO TA RESPONSABEL

Pa loke e capitan H.H.C., Hues ta haya cu e capitan ta responsabel di e cargamento di e boto. Hues ta haya cu ta conoci cu riba gran escala ta trafica droga den e area Sur Americano. Hues ta di opinion cu e capitan mester a investiga cu e boto no tin droga. Hues ta haya cu e capitan a keda sin investiga bodega 2.

Pesey Hues ta haya cu e capitan H.H.C. ta responsabel pa e lote di droga. Hues a mustra cu droga ta causa hopi miseria den comunidad. Mirando e cantidad grandi di droga, esaki ta destina pa otro lugar. Esaki ta causa hopi problema na otro lugar. E capitan H.H.C. a contribui cu esaki.

 

CASTIGO

Hues a bisa cu e ta tene cuenta cu e cantidad grandi di droga y a condena H.H.C. na 10 aña di prison. Hues a bisa cu Fiscal lo por apela e caso si e ta desea y tambe e capitan lo por apela. Por a mira cu e cuater tripulantenan a keda hopi contento mientras cu e capitan a keda manera den shock pa e condena.

 

FISCAL NO CONTENTO

Por a ripara cu Fiscal no tabata nada contento cu e sentencia. E sentencia tabata manera un baño di awa frieu pa Fiscal. Despues di a ricibi e sentencia ariba papel, el a lanta bay cu un cara hopi serio. Esaki ta un indicacion cu posiblemente Fiscal lo apela e caso.

   DIARIO por a compronde cu e abogado di e capitan lo bay apela e sentencia pasobra e no ta di acuerdo cu e castigo asina halto.

   Esey ta nifica cu otro aña lo por spera cu den Corte Superior lo trata e caso aki di nobo.

 

- Advertisement -

DUNA COMENTARIO

Please enter your comment!
Please enter your name here