Home Editorial Crisis politico local den un situacion mundial catastrofico

Crisis politico local den un situacion mundial catastrofico

193
0
SHARE
- Advertisement -

         Durante ultimo siman, e atencion di DIARIO tabata dirigi riba e desaroyonan politico local cu nos tabata pone enfrente di informacionnan importante cu tabata nace riba escenario internacional y den Reino.

Aruba,  cu mester a atende un crisis financiero y economico severo cu a bira realidad durante ultimo decada, a bira parti di un situacion catastrofico causa na nivel mundial door di e coronavirus nobo.

         Algun dia pasa un crisis politico local a surgi na momento cu Aruba mester atende cu Reino Hulandes pa por sigura un futuro aceptabel pa e pais. Cu e negociacion entre Aruba y Reino ta sumamente dificil, ta algo conoci pa tur ciudadano di Aruba.

         Aruba mester yega na un entendimento responsabel cu Reino ya cu Aruba no tin e forsa propio pa por enfrenta e saldo di Covid-19 cu a destrui e economia di Aruba cu tabata fragil sigur despues di e fracaso di Citgo.

         Na mes momento Aruba mester trata na atrae inversionistanan den e negoshi cu e tankinan na Aruba ta nifica y tambe necesidad di diversificacion di economia cu no tin e garantia solido di turismo actualmente.

         Siman pasa informacionnan internacional alarmante a yega Aruba ora paisnan grandi manera Alemania tabata confirma cu nan ta den un recesion economico severo, cu ta e realidad di Reino Hulandes, Union Europeo y Merca pa menciona algun pais di importancia grandi pa Aruba.

         Den e situacion aki a surgi e crisis politico na Aruba, cu basa riba nos leynan no tabata tin motibo pa bira crisis. DIARIO na forma amplio a splica con un gobierno di coalicion ta funciona segun ley cu ta basa riba representacion directo di pueblo den Parlamento pa medio di participacion di partido na eleccion.

         Despues di un reunion den Parlamento, e representacion di pueblo cu mester percura pa democracia y nos orden di ley ta base di nos gobernacion y ta encarga cu nombramento di ministronan, nos mester cuestiona e inventario di e crisis cu a laga un sabor amargo atras.

         DIARIO a informa Aruba contenido di ley. DIARIO a sigui e reunion y e espectaculo politico cu a desaroya a base di e crisis.

         Pa duna nos opinion riba e inventario di e crisis, kico e crisis a contene y kico e tabata nifica pa Parlamento, nos mester conclui cu e contenido di e crisis no a merece pa obstaculisa e sano desaroyo di Aruba durante un crisis mundial.

         Ora nos pone loke a bini dilanti durante e reunion di Parlamento, ningun momento nos a topa cu e tareanan directo di Parlamento debi na e deber di Parlamento pa cuida bienestar di Aruba.

         Nos no por a mira bienestar di Aruba den un cantidad di insinuacion, cu segun nos sistema nos mester wordo atende na e forma aki pero segun proceduranan  fiho di nos sistema.

         Nos no kier uza e palabra redashi, pero cu tur sinceridad ora tuma nota di e forma cu ley ta describi con nos sistema politico mester funciona, nos mester puntra nos mes si Parlamento conoce su tarea y ley.

         Nos ta contento cu Ministro Presidente Wever-Croes a dicidi cu e lo habri caminda atrobe pa un entendimento pa deshaci di e crisis.

         Nos ta keda cu confiansa den e habilidad di Ministro Presidente Wever-Croes pa saca Aruba for di e crisis pa asina atencion di Aruba ta dirigi riba un futuro pa nos industria petrolero den cual nos tankinan di azeta mester habri porta pa Aruba, cu mester dedica tur su atencion na negociacion den Reino pa por  enfrenta un crisis mundial espantoso.

 

 

- Advertisement -

DUNA COMENTARIO

Please enter your comment!
Please enter your name here