Home Bites Borchi nobo di Radisson Blu a aparece riba edificio na Palm Beach

Borchi nobo di Radisson Blu a aparece riba edificio na Palm Beach

694
0
SHARE
- Advertisement -

Lo bay trece un epoca nobo den turismo di upper-scale

ORANJESTAD (AAN) – Siman a cera cu pa hopi hende sorprendi, cu e proyecto cu antes tabata conoci como Aqua Condominiums, a lanta cu e emblema di Radisson Blu riba dje.

   Pero ta desde September 2019 caba cu DIARIO a revela cu Radisson Blu a tuma over e proyecto di Aqua Condominiums, y cu Gobierno a firma un carta di compromiso hunto cu Beachside Development Company y Radisson Hotels International.

   E proyecto hotelero aki a cuminsa na aña 2007 y a encontra hopi dificultad na caminda y a keda stagna pa varios aña.  E bon noticia a drenta tres aña pasa ora cu Venancio Gonzalez a cumpra e propiedad aki. Despues di esaki na aña 2018 e inversionista a acerca Radisson Hotels International cu e idea pa desaroya y converti e proyecto aki den un Radisson Blu Hotel.

   Radisson Blu Hotel ta un proyecto grandi cu un inversion di mas o menos 80 miyon Dollar cu lo tin un impacto sumamente positivo pa Aruba su economia. E desaroyador a haci un compromiso cu Gobierno cu ora e proyecto finalisa nan lo emplea mas tanto yiunan di tera den nan servicio.

   DIARIO a haya sa cu Radisson Blu lo bay contene 208 camber hopi luhoso pa atrae e turistanan cu tin un “spending capacity” hopi halto. Radisson ta premira cu pa por duna un servicio di alta calidad, e hotel lo mester 190 empleado den servicio.

   E hecho cu durante e pandemia aki keto bay trabao di construccion a sigui na Radisson Blu, ta indica cu e inversionista tin confianza den Gobierno di Aruba, y a haya hopi cooperacion di Ministro di Turismo Dangui Oduber pa e inversion den e proyecto, y cu a logra convence Radisson Blu pa habri su prome propiedad na Aruba.

  Radisson Blu ta wordo considera un “upper scale” hotel, y tin como 380 di nan rond mundo.  Nan tin hopi bista pa crea espacionan yen estilo, cu un forma unico pa relaha e bishitantenan.  Esaki nifica cu e empleadonan ta duna servicio manera ningun otro, y alavez crea experiencianan significativo y memorable pa e huespednan.  E experiencia mas bien ta dirigi riba e personalizacion pa cada huesped, y asina ta pone atencion riba e detayenan di mas chikito.  Ademas di e filosofia proactivo di servicio aki, nan ta duna tur huesped Wi-Fi gratis, y ta enfoca hopi riba nan creacion di platonan manera ningun otro den nan cushina.

  E cadena aki ta fit den vision y maneho di minister Dangui Oduber cu ta boga pa turistanan di calidad y tambe proyectonan di calidad manera esaki.

  Radisson Blu ta keda net panort di Palm Beach Plaza Mall.

- Advertisement -

DUNA COMENTARIO

Please enter your comment!
Please enter your name here