Home Gobierno Aruba su problemanan financiero no ta bay caba ora cu e aña...

Aruba su problemanan financiero no ta bay caba ora cu e aña aki bolter

415
0
SHARE
- Advertisement -

Prome Minister Evelyn Wever Croes

*e aña aki, Covid ta bay causa hopi daño financiero, pero e daño aki nos lo sigui sinti’e otro aña

ORANJESTAD (AAN): Durante Cumbre Virtual di diaranzon, un encuentro di gremionan comercial y sindical hunto cu lidernan politico, Prome Minister Evelyn Wever-Croes a duna un update relaciona cu situacion actual di Pais Aruba.

   Segun Prome Minister, a dicidi di cuminsa cu e encuentronan virtual aki, despues cu na comienso di Juli a haya e pakete di condicionnan nobo cu Hulanda a impone riba Aruba pa por haya e di tres tranche di fianza pa luna di Juli.

   Di sorpresa por bisa, pasobra e mandatario a enfatiza, cu Aruba a cumpli cu tur exigencia cu Hulanda a impone, pa asina por a bin na remarca pa di tres tranche. Sin embargo, apenas 4 dia prome cu tratamento den Conseho di Minister di Reino, Gobierno di Aruba a haya e pakete di documentonan y den esaki por a mira kico realmente tabata intencionnan di Hulanda.

   Hulanda a bisa cu di un banda nan ta prestando Aruba hopi placa, riba 500-600 miyon florin e aña pa por mantene nos cabes riba awa, cu e placa aki Gobierno por cumpli cu tur su gastonan, como tambe subsidio di salario pa trahadornan, como tambe asistencia cu ta wordo duna na empresanan grandi y chikito.

    A base si esaki, prome cu e crisis aki, Hulanda no tabata presta Aruba placa y tabatin un supervision, pasobra cu maneho financiero di Aruba no tabata responsable den ultimo añanan aki. Prome Minister a enfatiza cu nos maneho financiero no tabata responsable.  

   E supervision financiero cu Hulanda a impone e tempo ey tabata den LAFT, e ley di supervision financiero. Hulanda ta bisa awo, cu nan ta presta mas placa y nan kier tin mas supervision financiero.

   Posicion di Gobierno ta cu nan no tin miedo di mas supervision financiero, pasobra ora tin un maneho financiero responsable, no mester tin miedo ken ta controla y mira kico nan ta haci. Esaki no ta e punto crucial di su Gobierno. Pero si con ta hink’e den otro.

   Hulanda a bisa cu mirando e situacion di e islanan, nan no kier solamente presta placa, pero kier yuda Aruba inverti den economia, pa asina esaki por bira fuerte, resiliente pa asina ta sigur cu Aruba lo paga e placa bek.   

   Pa por haci esaki, nan ta propone pa atraves di un entidad, cu tambe ta wordo regla atraves di un ley di Reino, stipula algun di e tareanan pa nan ta lo minimo cu ta necesario pa Aruba tin un economia fuerte y atraves di e entidad aki, yuda Aruba cu placa di inversion tambe pa haci nos economia mas fuerte.

   Hulanda kier un supervision na unda nan tin mas ‘grip’ y ancra esaki den un Ley di Reino y un Ley di Consenso, pa controla e situacion financiero di Aruba. Y di otro banda, nan tambe kier atraves di un Ley di Reino, tin mas di bisa con e placa cu nan ta presta ta bay wordo inverti. Pa esaki nan a bin cu un lista di tareanan minimo cu Aruba mester cumpli cune, cu nan ta delinea den e Landspakketen.  

-Di 15 di Juli pa fecha actual ta na unda nos ta para 

   Aruba ta actualmente enfrentando un di dos ola di COVID-19, cu net na momento cu economia a cuminsa pick up cu reapertura di fronteranan y turismo a cuminsa duna su frutonan,  e di dos ola a pone cu mester a para keto un rato, duna algun stap patras pa asina por bin mas fuerte bek.

   Aruba su problemanan financiero no ta bay ora cu e aña aki bolter. E aña aki, Covid ta bay causa hopi daño financiero, pero e daño aki nos lo sigui sinti’e otro aña.

   Aruba su so no por sali afor di e crisis aki. Gobierno a busca tur alternativa posibel pero e unico cu a keda tabata ayudo di Hulanda. Durante negociacionnan cu Hulanda, nan a haci lo humanamente posibel pa por a combence Hulanda pa haci mas cambio den locual nan a exigi na prome instante.

   E dolor real y actual di Pueblo di Aruba ta loke Gobierno a tene na cuenta. Y esey ta cu si nan no a tuma e ayudo, hopi hende lo sigui perde trabao, mas lo pasa hamber y mas negoshi lo cera. Esey lo kibra Aruba. Prome Minister a indica cu Aruba no tin hopi rosea financiero.

   Diabierna awo lo tin un reunion di Ministernan di Reino. Aruba no ta riba agenda, mirando cu den e ultimo reunion di 10 di Juli, cu a conta cu presencia di Prome Minister na Hulanda, a bin cu convenio cu Conseho di Minister a apodera Secretario di Estado Knops pa yega na areglonan cu Gobierno di Aruba, sin cu mester bay bek na Conseho di Minister di Reino.

    Aruba a cumpli cu tur condicion cu Hulanda a impone pa haya e di dos y di tres tranche.

   Prome Minister a agrega cu ainda nan ta negociando cu Hulanda y a logra pa convence Hulanda pa cambia algun aspecto den e pakete.       

- Advertisement -

DUNA COMENTARIO

Please enter your comment!
Please enter your name here